საფრანგეთის ახლადარჩეული პრეზიდენტი, ემანუელ მაკრონი დღეს, პრეზიდენტის რანგში, პირველად შეხვდა რუს კოლეგას, ვლადიმერ პუტინს.

მაკრონი და პუტინი ვერსალის სასახლეში შეხვდნენ ერთმანეთს. როგორც BBC წერს, მხარეების განსახილველი საკითხები სირიისა და უკრაინის კონფლიქტებს შეეხება.

Deutsche Welle-ს ცნობით, პუტინის ვიზიტი საფრანგეთში, განიხილება როგორც მოსკოვსა და მაკრონის წინამორბედ, ფრანსუა ოლანდს შორის არსებული დაძაბული ურთიერთობების მოგვარების მცდელობა:

"ბევრი სამომავლო რამ არის დამოკიდებული ამ პირველ შეხვედრაზე", - ამბობს რუსეთის ელჩი საფრანგეთში, ალექსანდრე ორლოვი.

საფრანგეთის საპრეზიდენტო კამპანიის დროს, რუსეთის ლიდერი, მაკრონის კონკურენტს, ულტრა-მემარჯვენე მარინ ლე პენის მხარდამჭერი იყო. ასევე, მაკრონის მხარდამჭერები რუს ჰაკერებს ადანაშაულებდნენ საარჩევნო პროცესში ჩარევასა და მაკრონის საწინააღმდეგო კამპანიის წარმოებაში. მოსკოვმა აღნიშნული ბრალდებები უარყო.

გასულ კვირას დიდი შვიდეულის სამიტი გაიმართა და ემანუელ მაკრონი პირველია მასში მონაწილე დასავლელ ლიდერებს შორის, ვინც ვლადიმერ პუტინს შეხვდა.

სამიტზე ემანუელ მაკრონმა აღნიშნა, რომ ბევრი საკითხი არსებობს, რაც რუსეთთან მოლაპარაკების გარეშე ვერ გადაწყდება. მან ასევე თქვა, რომ იგი აღმოსავლეთ უკრაინის კონფლიქტთან მიმართებით დათმობაზე არ წავა.