იუსტიციის უმაღლესი საბჭოს მოსამართლე წევრის, ლევან მურუსიძის განცხადება რამდენიმე მოსამართლემ გააკრიტიკა.

რატომ არის მნიშვნელოვანი: მურუსიძემ თქვა, რომ მოსამართლეები ამერიკის შეერთებულ შტატებში "ექსკურსიებზე დაჰყავთ".

  • "ხუთი დღით წავლენ, დაათვალიერებენ შენობებს, კარგია, რა თქმა უნდა, მივესალმები. გულწრფელად ვიძახი, ყველა ამბობს, რომ ჩავალთ შენობას ვნახავთ, ჩამოვალთ", — ამბობს მურუსიძე.
  • ლევან მურუსიძე ე.წ. სასამართლო კლანის გავლენიან წევრებად მოიაზრებიან. 23 ოქტომბერს იუსტიციის საბჭოში მოსამართლე წევრებად სწორედ ლევან მურუსიძე და დიმიტრი გვრიტიშვილი აირჩიეს.

დეტალები: თბილისის საქალაქო სასამართლოს მოსამართლე ეკა არეშიძემ მურუსიძის განცხადების შემდეგ პოსტი დაწერა. მისი თქმით, სიამოვნებით ივლიდა აშშ-ში ექსკურსიებზე, თუმცა აღნიშნავს, რომ ბევრად მნიშვნელოვანია ის, რაც ვიზიტების დროს შეიძინა.

  • "ბოლო ვიზიტის დროს 8-დან საღამოს 7 საათამდე, ყოველ დღე პროცესებს ვესწრებოდით და ამერიკელ კოლეგებს ვხვდებოდით;
  • მაოცებს, რომ არსებობენ ადამიანები, ვისაც შენობების მეტი არაფერი დაამახსოვრდა ამ ვიზიტებით, იმედია ასეთები უმცირესობაში არიან", — წერს ის.
  • "მადლობა ყველა იმ ქვეყანას და საერთაშორისო ორგანიზაციას, ვინც წლებია იღვწის და უამრავ რესურსს ხარჯავს ქართული სასამართლო სისტემის გაჯანსაღებისა და განვითარებისთვის;
  • იმედს ვიტოვებ რომ ეს თანამშრომლობა კვლავ გაგრძელდება და იმ ეტაპამდე მივალთ, რომ ექსკურსიებზე სიარულიც საკმარისი იქნება".

გარდა ამისა, ეკა არეშიძის პოსტის ქვემოთ კომენტარი დატოვეს სხვა მოსამართლეებმაც.

  • საქალაქო სასამართლოს მოსამართლე ლილი მსხილაძე წერს, რომ ამერიკაში სასამართლო პროცესებზე დასწრებამ დაანახა და ასწავლა შეჯიბრებითობაზე დამყარებულ პროცესებზე თუ რა დიდი როლი აქვს მოსამართლეს — "უამრავი მადლობა ამერიკელ კოლეგებს ჩვენი მხარდაჭერისთვის და გაძლიერებისთვის".
  • რუსთავის საქალაქო სასამართლოს მოსამართლე მადონა მაისურაძე ამბობს, რომ პარტნიორების დახმარებით უდიდესი გამოცდილება და ცოდნა შეიძინა თითოეულმა მოსამართლემ.
  • "სამუშაო ვიზიტებით საბჭოს წევრებიც არაერთ ქვეყანაში არიან ნამყოფი და ექსკურსიად აღქმა არასწორია. ამით ყველა იმ ადამიანის შრომის დაკნინება ხდება, ვინც ძალიან დიდ რესურს დებს საერთო საქმეში და რუსთავის საქალაქო სასამართლო ყოველთვის წარმატებით იყენებს იქ მიღებულ გამოცდილებას", — წერს მადონა მაისურაძე.
  • უზენაესი სასამართლოს მოსამართლე ეკატერინე გასიტაშვილი კი აცხადებს, რომ აშშ-ში ყოფნისას ძალიან საინტერესო სასამართლო სხდომებს დაესწრო და ქალთა როლის გაძლიერების თაობაზე არაერთი საინტერესო შეხვედრის მონაწილე იყო.