ინალ არძინბამ განცხადება მას შემდეგ გაავრცელა, რაც უკრაინის პრეზიდენტმა ყირიმთან ერთად, აფხაზეთისა და დნესტრისპირეთის დეოკუპაციის მნიშვნელობაზე ისაუბრა.

რატომ არის მნიშვნელოვანი: არძინბა არამხოლოდ საოკუპაციო რეჟიმის ე.წ. მთავრობის წევრია, არამედ კრემლის ყოფილი მრჩეველია და საქართველოს ოკუპირებულ რეგიონში პუტინის პოლიტიკასა და პროპაგანდას ატარებს, რაც ისტორიის გადაწერის მცდელობებსაც მოიაზრებს.

  • ჯერ კიდევ 2018 წელს უკრაინული მედია მას უკრაინაში ქვეყნის დესტაბილიზაციის გეგმის უშუალო ლიდერად და სეპარატისტად მოიხსენიებდა.
  • არძინბას ბრალი ედება უკრაინის სახელმწიფო საზღვრის შეცვლის მომზადებაში, თანამოაზრეების დაქირავებაში და ოდესის ოლქის ტერიტორიაზე სუვერენული სახელმწიფო "ბესარაბიის" ფორმირების წინაპირობების შექმნაში.

რა თქვა ზელენსკიმ: პირველი საპარლამენტო სამიტის წინაშე სიტყვით გამოსვლისას უკრაინის პრეზიდენტმა აღნიშნა, რომ ყირიმის პლატფორმის ფორმატი უნდა გახდეს საწყისი წერტილი სხვა ჰუმანიტარული და დიპლომატიური პლატფორმებისთვის.

  • "რომლებიც ხელს შეუწყობენ სხვა ტერიტორიების დეოკუპაციას: დნესტრისპირეთიდან და აფხაზეთიდან ჩრდილოეთ ტერიტორიებამდე", — განაცხადა მან.

რას ამბობს არძინბა: მისი მტკიცებით, ე.წ. აფხაზეთის რესპუბლიკის ხელოვნურად შეყვანის ნებისმიერ ფორმატში, რომელიც პოლიტიკური სტატუსის შეცვლას გულისხმობს, აბსოლუტურად უშედეგოა, რადგან მტკიცედ აქვთ გადაწყვეტილი, მიჰყვენ "სახელმწიფოებრიობის განმტკიცებისა და განვითარების გზას".

  • "ვოლოდიმირ ზელენსკიმ ე.წ. ყირიმის პლატფორმის ფორუმის მონაწილეებთან საუბრისას, რომელიც შეიქმნა, რომ ხელი შეუწყოს უკრაინის ხელისუფლების პრეტენზიებს რუსეთის ყირიმზე, გამოთქვა მოსაზრება, რომ ეს ფორმატი აფხაზეთზეც უნდა გავრცელდეს. კიდევ ერთხელ, უკრაინის პრეზიდენტი აჩვენებს, ისტორიის ცუდად ცოდნას და ეწევა პირდაპირ პროვოკაციებს", — განაცხადა მან.