აშშ-ში აცხადებენ, რომ ირანელი სამხედრო ტრენერები ყირიმში იმყოფებოდნენ და რუსულ ძალებს დრონების გამოყენებას ეხმარებოდნენ.

რატომ არის მნიშვნელოვანი: რამდენიმე კვირაა, რაც რუსეთი უკრაინულ დასახლებებს ირანული კამიკაძე დრონებით ბომბავს. ამის დამადასტურებელი არაერთი ფოტო-ვიდეო კადრი გავრცელდა.

  • უკრაინის ომში უპილოტო თვითმფრინავების გამოყენება ზაფხულის შემდეგ გაიზარდა, როდესაც მოსკოვმა შაჰიდ-136 თვითმფრინავი ირანიდან შეიძინა (ამას ადასტურებს უკრაინა და აშშ).

დეტალები: როგორც აშშ-ის სახელმწიფო დეპარტამენტის სპიკერი, ნედ პრაისის ამბობს, დადასტურებით შეიძლება ითქვას, რომ ყირიმში განლაგებულ რუს სამხედრო პერსონალს ირანი უპილოტო საფრენი აპარატების პილოტირებაში ეხმარებოდა.

  • "რუსეთი დრონებს უკრაინაში კინეტიკური დარტყმების განსახორციელებლად იყენებდა, მათ შორის, ბოლო დღეების კიევის თავდასხმისას".
  • თეთრი სახლის ეროვნული უსაფრთხოების სპიკერმა, ჯონ კირბმა კი აღნიშნა, რომ ვაშინგტონი ყველა საშუალებას გამოიყენებს ირანის მიერ რუსეთისთვის საბრძოლო მასალის მიწოდების გამოვლენისა და შეკავებისთვის.

კონტექსტი: დიდმა ბრიტანეთმა და ევროკავშირმა ირანს ე.წ. კამიკაძე დრონების გამო ახალი სანქციები დაუწესეს.

  • თუმცა, ირანი უარყოფს, რომ თეირანი რუსეთს დრონებს აწვდის. ირანის ელჩმა გაეროში ამირ საეიდ ირავანმა თქვა, რომ დასავლეთის ქვეყნები აწარმოებენ "დეზინფორმაციულ კამპანიას ირანის წინააღმდეგ".
  • ირანული დრონების გამოყენებას უარყოფს რუსეთიც და ამტკიცებს, რომ უკრაინის წინააღმდეგ გამოყენებული ყველა უპილოტო საფრენი აპარატი რუსულია და არა ირანული.