ევროკავშირის საბჭოს განცხადებით, ეს ნაბიჯი არის პასუხი რუსეთის გაუმართლებელ სამხედრო აგრესიაზე უკრაინის მიმართ და ასევე პასუხია "რუსეთის პრაქტიკაზე, გასცეს ოკუპირებული რეგიონების მაცხოვრებლებზე რუსული საერთაშორისო პასპორტები".

რატომ არის მნიშვნელოვანი: საბჭოს თქმით, რუსული პასპორტების სისტემატური გაცემა ოკუპირებულ რეგიონებში საერთაშორისო სამართლის მორიგი დარღვევაა.

  • რუსეთს ოკუპირებული აქვს საქართველოს 20% — აფხაზეთი და ცხინვალის რეგიონი.
  • 2014 წელს კრემლმა უკრაინის ნახევარკუნძულის, ყირიმის ანექსია გამოაცხადა. 2022 წელს კი ფართომასშტაბიანი სამხედრო მოქმედებები დაიწყო უკრაინის ტერიტორიაზე და ამ დროისთვის კიდევ ოთხი რეგიონის ანექსია გამოაცხადა.

დეტალები: საბჭოს დონეზე მიაღწიეს შეთანხმებას, რომლის თანახმადაც, უკრაინისა და საქართველოს ოკუპირებულ ტერიტორიებზე რუსეთის ფედერაციის მიერ გაცემული რუსული პასპორტების მფლობელები ევროპის საზღვარს ვერ გადაკვეთენ და ვერც ვიზებს მიიღებენ.

  • "ეს ასევე პასუხია რუსეთის ერთპიროვნულ გადაწყვეტილებაზე 2008 წელს საქართველოს ტერიტორიების აფხაზეთისა და სამხრეთ ოსეთის დამოუკიდებლობის გამოცხადების შესახებ".
  • საბჭოს თქმით, რუსული პასპორტების სისტემატური გაცემა ოკუპირებულ რეგიონებში საერთაშორისო სამართლის მორიგი დარღვევა და უკრაინის ტერიტორიულ მთლიანობაში, სუვერენიტეტსა და დამოუკიდებლობაში მორიგი ჩარევაა.

პროცედურები: ჩეხეთის შინაგან საქმეთა მინისტრი ამბობს, რომ უახლოეს პერიოდში ამ საკითხზე მოლაპარაკებები დაიწყება ევროპარლამენტთან.

  • ოკუპირებულ რეგიონებში გაცემული რუსულ პასპორტებს ევროკავშირის წევრი ქვეყნები "ან უკვე არ აღიარებენ, ან არაღიარების პროცესში არიან".

  • ევროპული საბჭოს ახალი გადაწყვეტილება კი ერთობლივი ნაბიჯია, რომელიც შესაძლებელს გახდის ვიზის საერთო პოლიტიკის ეფექტურ ფუნქციონირებას და ასევე უზრუნველყოფს ევროკავშირის წევრი ქვეყნების უსაფრთხოებას.