აფეთქება, რომელმაც ქერჩის ხიდის დაზიანება გამოიწვია დღეს, 8 ოქტომბერს გამთენიისას მოხდა.

რატომ არის მნიშვნელოვანი: რუსეთიდან ყირიმამდე თითქმის 19 კილომეტრიანი ხიდი კრემლის ოკუპაციის ერთგვარი სიმბოლოა. ის 2018 წელს ნახევარკუნძულის ანექსიის გამოცხადებიდან 4 წელში გახსნეს.

  • ქერჩის ხიდი ერთ-ერთი საკვანძო გზაა, რითაც ოკუპანტებს სამხედრო ტექნიკა და ტვირთი გადააქვთ.
  • ხიდის დაზიანების გამო, რუსეთს უკრაინის სამხრეთში მხოლოდ ერთი სარკინიგზო მომარაგების ხაზი რჩება — მელიტოპოლიდან.

რა მოხდა: როგორც ვიდეოებიდან ჩანს ხიდზე იყო ძლიერი აფეთქება, რომლის გამომწვევი ოფიციალური მიზეზი დადასტურებული არ არის.

  • რუსეთის ოფიციალურმა პირებმა თქვეს, რომ აფეთქდა საწვავის სატვირთო მანქანა. თუმცა დაზიანება მასშტაბური იყო — ყირიმის მიმართულებით გზის გადასასვლელის ორი მონაკვეთი ჩამოინგრა.
  • ცეცხლი გაუჩნდა სატვირთო მატარებელსაც. ამ დროისთვის ხანძარი ლიკვიდირებულია.
  • როგორც BBC-ს რუსული ბიურო ექსპერტებზე დაყრდნობით წერს, ამ მასშტაბის დაზიანებას დიდი რაოდენობით ასაფეთქებელი საშუალება დასჭირდებოდა.

რუსეთი: კრემლს სურს, ყირიმის ხიდზე მომხდარი აფეთქება გამოიძიოს. პრეზიდენტმა ვლადიმერ პუტინმა ბრძანება გასცა, შეიქმნას სამთავრობო კომისია საგანგებო სიტუაციის მიზეზების დადგენისა და შედეგების აღმოსაფხვრელად.

  • სამთავრობო კომისიაში იქნებიან კრასნოდარისა ლიდერი და ოკუპირებული ყირიმის ე.წ. ხელმძღვანელიც;
  • როგორც Meduza წერს, საგამოძიებო კომიტეტმა საქმე გახსნა ყირიმის ხიდზე მომხდარი "ინციდენტის" გამო, მაგრამ არ დაუკონკრეტებია, რომელი მუხლით.

უკრაინა: ადგილობრივი მედიები წერენ, რომ მთავრობიდან წყაროები ეუბნებიან, რომ ყირიმის ხიდზე აფეთქება უკრაინის უშიშროების სამსახურის (SBU) ოპერაციის შედეგად მოხდა. ოფიციალურმა პირებმა გააკეთეს კომენტარები აფეთქებაზე, თუმცა პირდაპირ არ დაუდასტურებიათ, რომ უკრაინა პასუხისმგებელია აფეთქებაზე.

  • "ყველაფერი უკანონო უნდა განადგურდეს, მოპარული უნდა დაუბრუნდეს უკრაინას, ყველაფერი, რაც რუსეთის მიერ არის ოკუპირებული, უნდა გათავისუფლდეს", — წერს პოდოლიაკი;
  • "რუსული ფლოტის ფლაგმანის, მოსკოვი და ქერჩის ხიდი — უკრაინის კუთვნილ ყირიმში რუსეთის ძალის ორი ცნობილი სიმბოლო უკვე დაეცა. რა არის შემდეგი", — აცხადებს უკრაინის თავდაცვის სამინისტრო;
  • ეროვნული უსაფრთხოებისა და თავდაცვის საბჭოს მდივანი, ოლექსი დანილოვი ყირიმის ხიდზე აფეთქების ვიდეოსთან ერთად მერლინ მონროს შესრულებით სიმღერასაც აქვეყნებს: Happy Birthday, Mr. President.

გარდა ამისა, უკრაინის ფოსტამ უკვე მარკის ახალი დიზაინი გამოუშვა.

სტრიქონებს შორის: ოფიციალური უკრაინა ყოველთვის აცხადებს, რომ ნებისმიერი ოკუპირებულ ტერიტორიაზე რუსეთის ძალების მიერ შექმნილი ნაგებობები თუ ტექნიკა ლეგიტიმური სამიზნეა.

  • პრეზიდენტ ვოლოდიმირ ზელენსკის განცხადებით, უკრაინის მიზანი რუსეთის მიერ ოკუპირებული ყველა ტერიტორიის გათავისუფლება და იქ უკრაინული დროშის დაბრუნებაა.