ამის შესახებ პრეზიდენტმა BBC-ის უკრაინულ გამოცემასთან ისაუბრა.

რატომ არის მნიშვნელოვანი: კრემლის მთავარი პროპაგანდისტის, ალექსანდრ დუგინის შვილი მანქანაში ააფეთქეს. პირველივე დღეებიდან რუსული პროპაგანდა ცდილობდა, ეს უკრაინისთვის დაებრალებინა.

  • მალევე FSB-მ განაცხადა, რომ საქმე გახსნეს და დუგინას მკველობაში მონაწილე უკრაინის 2-მა მოქალაქე გამოავლინეს, რომელთაგან ერთი აზოვის ბატალიონის წევრია.
  • აზოვში განაცხადეს, რომ ბრალდებულს მათთან კავშირი არ აქვს, ზელენსკი კი ამბობდა, რომ ქალი უკრაინის მოქალაქე არ არის.
  • რამდენიმე დღის წინ საერთაშორისო მედიაში აშშ-ის დაზვერვაში წყაროებზე დაყრდნობით გავრცელდა ინფორმაცია, რომ დუგინას მკვლელობა, შესაძლოა, უკრაინამ დაგეგმა.

დეტალები: სწორედ ამაზე დაუსვა კითხვა ზელენსკის BBC-ის ჟურნალისტმა, რასაც პრეზიდენტმა ერთი წინადადებით უპასუხა:

  • "ჩვენ არაფერი გვაქვს საერთო ამ საქმესთან".

ვინ არის დარია დუგინა: ის პუტინის მთავარი იდეოლოგის, ანუ მამის ერთ-ერთ უახლოეს თანამოაზრედ მიიჩნეოდა.

  • არაერთხელ გამოჩნდა რუსულ სამთავრობო მედიაში, სადაც პროსახელისუფლებო შეხედულებებს ავრცელებდა, აკრიტიკებდა დასავლეთს და უკრაინაში შეჭრას უჭერდა მხარს.
  • უკრაინაში შეჭრას დუგინამ საჯაროდ დაუჭირა მხარი და ტელეგრამის არხზე რუსეთის დიდებაზე იმპერიალისტური შინაარსის პოსტი გამოქვეყნა.
  • ის ორჯერ მოხვდა დიდი ბრიტანეთისა და ავსტრალიის სანქცირებულთა სიაში, რაზეც თქვა: "მათ უკეთესი ვერავინ იპოვეს და მე, რიგითი ჟურნალისტი შემიყვანეს, რომელსაც ქონება არ აქვს".
  • ივნისის შუა რიცხვებში ის აზოვსტალის ქარხანას ეწვია და პროპაგანდისტული რეპორტაჟი მოამზადა, თავის ბოლო მოხსენებაში კი ცდილობდა დაემტკიცებინა, რომ ბუჩას მკვლელობები დადგმული იყო.