House of the Dragon-ის მე-7 ეპიზოდის სცენებს სერიალის ფანების მხრიდან დიდი გამოხმაურება მოჰყვა. ერთი მხრივ, გულშემატკივრები თვლიან, რომ ეს სეზონის საუკეთესო სერია იყო, მეორე მხრივ კი, ბნელი სცენების გამო HBO-ს აკრიტიკებენ.

მას შემდეგ, რაც სერიალის ფანებმა ბოლო ეპიზოდის გამო ტვიტერზე იმედგაცრუება გამოხატეს, HBO-მ პასუხის გაცემა გადაწყვიტა. HBO-ს ერთ-ერთმა ანგარიშმა House of the Dragon-ის შემქმნელების არჩევანი დაიცვა და განაცხადა, რომ ბნელი სცენები "მიზანმიმართული შემოქმედებითი გადაწყვეტილება" იყო.

ფოტო: HBO

"HBO-სგან წერილობითი ბოდიში მჭირდება House of the Dragon-ის ახალი ეპიზოდის ბნელი სცენების გამო", — დაწერა ტვიტერზე ერთ-ერთმა მომხმარებელმა, რომელსაც HBO-მ ბოდიში მართლაც მოუხადა.

"გამარჯობა, სტეფან. ვაფასებთ, რომ House of the Dragon-ის მე-7 ეპიზოდის ღამის სცენების გამო გამოგვეხმაურეთ, რომელიც თქვენი ეკრანისთვის ზედმეტად ბნელი აღმოჩნდა. ამ სცენის მკრთალი განათება მიზანმიმართული შემოქმედებითი გადაწყვეტილება იყო. მადლობა!", — ასე უპასუხა HBO-მ იმედგაცრუებულ გულშემატკივარს.

შეგახსენებთ, რომ Game of Thrones-მაც ბნელის სცენების გამო სწორედ ასეთი გამოხმაურება გამოიწვია. Game of Thrones-ის შემქმნელები ფინალური სეზონის ერთ-ერთი ყველაზე მნიშვნელოვანი ეპიზოდის, The Long Night-ის გამო გააკრიტიკეს, რადგან ამ სერიის სცენებიც საკმაოდ ბნელია.