მთავარი პროკურორმა, ირაკლი შოთაძემ რუსთავი 2-ის გენერალური დირექტორის ინფორმაციას იმის შესახებ, რომ ამავე ტელეკომპანიის საქმის მოსამართლე, ნათია გუჯაბიძე თაღლითობაშია შემჩნეული, საზოგადოების შეცდომაში შეყვანის მიზანმიმართული მცდელობა უწოდა:

"არასდროს საქართველოს პროკურატურაში არანაირი ინფორმაცია, არანირი განცხადება, არანაირი საჩივარი მოსამართლე ნათია გუჯაბიძის მიმართ არ შემოსულა, შესაბამისად არანაირი გამოძიება, მით უმეტეს სისხლისამართლებრივი დევნა არ მიმდინარეობს. ეს არის ცალსახა ტყუილი".

შოთაძემ ასევე განმარტა, რომ ვიდრე ასეთ ინფორმაციას ვინმე გაავრცელებს, შესაძლებელია ის პროკურატურაში გადამოწმდეს:

"აშკარაა, რომ არავის არ გადაუმოწმებია ეს ინფორმაცია. მისი გავრცელების მიზანი, რომელიც ეხებოდა საქართველოს პროკურატურას, ვითომდა ჩვენ დევნას ვახორციელებთ მოსამართლე ნათია გუჯაბიძის მიმართ, აშკარად პროკურატურის მიზანმიმართული დისკრედიტაციისა და საზოგადოების შეცდომაში შეყვანის მცდელობაა".

რუსთავი 2-ის გენერალურმა დირექტორმა, ნიკა გვარამიამ საგანგებო ბრიფინგზე განაცხადა, რომ ტელეკომპანიისთვის კონფიდენციალური წყაროსგან ცნობილი გახდა, რომ რუსთავი 2-ის საქმის ერთ-ერთი მოსამართლე, ნათია გუჯაბიძე თაღლითობაშია შემჩნეული და მის მიმართ პროკურატურა სწორედ ამ ბერკეტის გამოყენებით ახდენს ზეწოლას.