დღეს რუსეთის პრეზიდენტმა, რომელიც თვეების განმავლობაში ირწმუნებოდა, რომ მობილიზაციას არ გეგმავდნენ, "ნაწილობრივი მობილიზაცია" გამოაცხადა.

რატომ არის მნიშვნელოვანი: ეს ნიშნავს, რომ ასიათასობით მოქალაქეს უკრაინაში ომში მოუწევს ჩართვა.

  • პუტინი და შოიგუ ამტკიცებენ, რომ საუბარია მხოლოდ მათზე, ვისაც სამხედრო გამოცდილება აქვს, დაახლოებით 300 000 რეზერვისტზე, თუმცა, პუტინის ხელმოწერილ ბრძანებაში არის საიდუმლო მუხლი, რომელიც, სავარაუდოდ, მათი რაოდენობის გაზრდის საშუალებას მისცემს.
  • დასავლელი ლიდერები პუტინის გადაწყვეტილებას შიშის დემონსტრირებად მიიჩნევენ და აცხადებენ, რომ ამით ნაწილობრივ აღიარა "სპეცოპერაციის" მარცხი.

რა ხდება რუსეთში: როგორც Meduza წერს, ჯერ კიდევ ზაფხულში სამობილიზაციო ბრძანებების დაგზავნა დაიწყო და ახლა მათი მფლობელები ვალდებულნი არიან მივიდნენ სამხედრო აღრიცხვაზე და გაწვევისა და გამოძახების გარეშე.

  • პარალელურად, ვრცელდება ინფორმაცია იმაზეც, რომ სამხედრო აღრიცხვის ოფისებმა დაიწყეს წვევამდელების გამოძახება.

  • TV Rain-ის ინფორმაციით, სახელმწიფო დუმაში ამბობენ, რომ ქვეყნიდან გასვლაზე შეზღუდვები არ იქნება, თუმცა მობილიზაციას დაქვემდებარებულ მოქალაქეებს მოუწოდეს, არ წავიდნენ დასასვენებლად საზღვარგარეთ.

  • უკვე შეიქმნა პეტიცია მობილიზაციის წინააღმდეგ, რომელსაც თითქმის 200 000 ხელმომწერი ჰყავს.
  • ციმბირში კი საპროტესტო აქციაც გაიმართა, სადაც რამდენიმე პირი დააკავეს.

გაქცევის მცდელობები: ვინაიდან მობილიზაცია დღეიდან დაიწყო, რუსეთში პანიკაა და მოქალაქეთა ნაწილი ქვეყნიდან თავის დაღწევას დღესვე ცდილობს.

  • ადგილობრივი გამოცემები წერენ, რომ რამდენიმე წუთში სრულად გაიყიდა დღევანდელი ბილეთები მოსკოვიდან ერევნის, სტამბულისა და ბაქოს მიმართულებით და თან ბილეთების ფასიც გაიზარდა.
  • დღესვე გავრცელდა ინფორმაცია, რომ ლატვია არ მიიღებს რუსეთის მოქალაქეებს, რომლებიც მობილიზაციას გაექცევიან.
  • Google Trends-ის მიხედვით, ბოლო 2 დღის განმავლობაში, როცა ვრცელდებოდა ინფორმაცია მობილიზაციის გამოცხადების შესაძლებლობაზე, დიდი ინტენსივობით იგუგლებოდა ფრაზა — "როგორ წავიდეთ რუსეთიდან".
  • პარალელურად, რუსულ წყაროებზე უკვე ნახავთ სტატიებს სათაურებით: "სად გავიქცეთ ახლა რუსეთიდან — ქვეყნების სია", "რა უნდა გააკეთო, თუ არ გინდა უკრაინაში ბრძოლა?".