BMG-ს ჟურნალისტი ამის შესახებ ფეისბუქგვერდზე წერს.

რატომ არის მნიშვნელოვანი: სამთავრობო უწყებების მხრიდან კრიტიკული მედიების წარმომადგენლების ბრიფინგზე არშეშვება ქართული ოცნებისთვის უცხო არაა. მსგავსი შემთხვევა ადრეც მომხდარა.

  • როგორც ჟურნალისტი თელარა გელანდია ამბობს, პრესსამსახურის თანამშრომელმა, ნინო ცხადაძემ განუმარტა, რომ "ის წესებს არღვევს, ბევრ კითხვას სვამს და სხვა კოლეგებს აწუხებს".

დეტალები: ჟურნალისტი განმარტავს, რომ BMG-დან მხოლოდ მას აუკრძალეს სხდომაზე შესვლა, სხვაზე კი პრობლემა არ აქვთ.

  • ის ეჭვობს, რომ მთავრობის ადმინისტრაცია გააღიზიანა მისმა 9 სექტემბრის სიუჟეტმა, სადაც მოჰყვა, თუ როგორ ირღვევა კანონი და ორი წელია მთავრობის არცერთი განკარგულება არ გამოუქვეყნებიათ.
  • On.ge ცდილობს მთავრობის ადმინისტრაციასთან დაკავშირებას და პასუხს მოწოდებისთანავე შემოგთავაზებთ.
  • ფინანსთა მინისტრმა მთავრობის სხდომის შემდეგ გამართულ ბრიფინგზე თქვა, რომ ამაზე ინფორმაცია არ ჰქონდა და ადმინისტრაცია გააკეთებდა კომენტარს.

ჟურნალისტური ეთიკის საბჭო აცხადებს, რომ საჯარო უწყების მხრიდან მსგავსი ქმედება დაუშვებელია და ამძიმებს ჟურნალისტების მიმართ არსებულ მტრულ გარემოს.

  • ისინი აცხადებენ, რომ მედიის მიმართ არათანაბარი მიდგომა დაუშვებელი და დისკრიმინაციულია.
  • "მედიის როლი დემოკრატიული საზოგადოების განვითარებაში შეუცვლელია, ამიტომაც მნიშვნელოვანია, რომ ყველა მედიასაშუალების წარმომადგენელი თანაბარ პირობებში იყოს", — ამბობენ ისინი.
  • ქარტია მთავრობას მოუწოდებს, არ ჩააყენონ დისკრიმინაციულ მდგომარეობაში კრიტიკული მედიის წარმომადგენლები და შეუქმნან სათანადო სამუშაო პირობები.