დღეს პარლამენტში საშემოდგომო სესია გაიხსნა, პლენარულ სხდომაზე კი ყველასთვის გასაკვირად, ერთ-ერთ მთავარ განსახილველ თემად საქართველოს ეროვნული ნაკრებისა და ნაპოლის ფეხბურთელი ხვიჩა კვარაცხელია იქცა.

რატომ არის მნიშვნელოვანი: პოლიტიკური განცხადებები ქართული ოცნების თავმჯდომარემ გახსნა და სპორტზე ისაუბრა. უფრო კონკრეტულად კი თქვა, რომ ოპოზიციას ქართველი სპორტსმენების წარმატება არ უხარია.

  • "ნაციონალებმა სპორტის სახეობა არ დატოვეს, რომ ყველაზე წარმატებულ სპორტსმენებს არ დაპირისპირებოდნენ", — განაცხადა პარტიის ლიდერმა.
  • ასევე, კრიტიკული მედიის წარმომადგენლები ვახო სანაია და მიშა მშვილდაძე კვლავ ოპოზიციასთან დააკავშირა და აღნიშნა, რომ "ხვიჩაზე მაგარი თავდამსხმელები ვერასდროს გახდებიან ".
  • არ დაავიწყდა ეხსენებინა "რადიკალური ოპოზიცია" — მისი განცხადებით, მათ "ორგანულად აღიზიანებთ და აშფოთებთ ნებისმიერი წარმატება, რომელსაც საქართველო აღწევს".

პასუხად, ენმ-ის დეპუტატმა ანა წითლიძემ თქვა, რომ კობახიძემ დიდი სიბინძურე იკადრა კვარაცხელიასთან დაკავშირებით და ფეხბურთელი "სამეგრელოს და სრულიად საქართველოს საამაყო შვილია".

  • ენმ-ის კიდევ ერთმა დეპუტატმა, ლევან ხაბეიშვილმა ქართული ოცნების თავმჯდომარეს "შეუმდგარი" უწოდა და აღნიშნა, რომ არ უკვირს წარმატებული ადამიანების უკან ამოფარებას რომ ცდილობს.
  • მანვე ხაზი გაუსვა, რომ "წყალბურთი, ფეხბურთი და კალათბურთი რომ ვერ გაურჩევია" ის კაცი ასწავლით სპორტსმენების სიყვარულს.
  • მსგავსი შეფასება ჰქონდა პარტიის კიდევ ერთ წევრს, დავით კირკიტაძესაც — მისი თქმით, ადამიანი, რომელიც კალათბურთის მატჩზე საფეხბურთო გუნდის მაისურით დადის, ოპოზიციას ამუნათებს.
  • კირთაძემ განმარტა, რომ ის პირები, რომლებიც კვარაცხელიას აკრიტიკებენ და ვინც კობახიძემ მათ წევრებად წარმოაჩინა, არასდროს ყოფილან ენმ-ში.

გარდა ამისა, გახარიას პარტიის წევრმა, ალექსანდრე მოწერელიამ განაცხადა, რომ კვარაცხელიას ხსენება ემსახურება მისი მეშვეობით ქულების დაწერას, რაც ამორალურად შეაფასა.

  • "არცერთ მხარეს არ გაქვთ პოლიტიკური დღის წესრიგი შესათავაზებელი ხალხისთვის. ხვიჩა კვარაცხელია ფეხბურთელია, აპოლიტიკური ფიგურაა და ამ ახალგაზრდა კაცის მითვისების მცდელობა, მის ხარჯზე პარაზიტობა აზიანებს მას პირველ რიგში და ზოგადად ჩვენს ქვეყანას".