უკრაინის პროკურატურამ დაშავებული და დაღუპული ბავშვების შესახებ ინფორმაცია განაახლა. თუმცა მონაცემები საბოლოო არ არის, რადგან დაბომბვის ადგილების შემოწმება აქტიური საომარი მოქმედებების ზონებში და დროებით ოკუპირებულ ტერიტორიებზე ვერ ხერხდება.

რატომ არის მნიშვნელოვანი: პუტინის გაუმართლებელ ომს, რომელიც თითქოსდა დემილიტარიზაციას ემსახურება, მშვიდობიანი მოქალაქეები, მათ შორის, ბავშვებიც ეწირებიან.

  • რუსებმა არაერთხელ დაბომბეს დასახლებები, ევაკუაციის სივრცეები და თავშესაფრები, წარწერით "ბავშვები".
  • ეს კიდევ ერთხელ უსვამს ხაზს ოკუპანტების სისასტიკეს და იმას, რომ პუტინი საკუთარი მიზნების მისაღწევად არაფერს ერიდება.

რიცხვებში: ომის დაწყებიდან დღემდე 376 ბავშვი დაიღუპა, 733-ზე მეტი ბავშვი დაშავდა, მათ შორის:

  • დონეცკის ოლქში — 388;
  • ხარკოვის ოლქში — 202;
  • კიევის ოლქში — 116;
  • ჩერნიგოვის ოლქში — 68.

დეტალები: პროკურატურის განცხადებით, 24 აგვისტოს ოკუპანტების მიერ დნეპროპეტროვსკის ოლქის დაბომბვას 6 და 11 წლის ბავშვები ემსხვერპლნენ — დაშავდა 5 ბავშვი.

  • უწყების ცნობით, ოკუპანტების თავდასხმის შედეგად უკრაინაში 2328 სასწავლო დაწესებულებაა დაზიანებული. მათგან 289 მთლიანად განადგურდა.

გაეროს განცხადებით, ომი დამანგრეველ გავლენას ახდენს უკრაინის 7,5 მილიონ ბავშვზე.

  • ორგანიზაციის მონაცემებით, უკრაინელ ლტოლვილთა რიცხვი 11 მილიონს გადასცდა.