დღეს, 2 ივნისს, პოლიციის დღე აღინიშნება. ამ დღესთან დაკავშირებით შინაგან საქმეთა სამინისტროს მიმდებარე ტერიტორიაზე დილიდან საზეიმო ღონისძიება იმართება, რომელზეც წარმოდგენილია საპატრულო პოლიციის ავტომობილები და მოტოციკლები და ჯავშან-ტექნიკა. საზეიმო ღონისძიებას, პოლიციელებთან ერთად, პრემიერმინისტრი, მთავრობისა და პარლამენტის წევრები, დიპლომატიური კორპუსის წარმომადგენლები და უცხოელი სტუმრები ესწრებიან.

ღონისძიებაზე შინაგან საქმეთა მინისტრმა, გიორგი მღებრიშვილმა, დამსწრე საზოგადოებას პოლიციის დღე მიულოცა, რის შემდეგაც საქართველოს სახელმწიფო ჰიმნი შეასრულეს:

"მე ვიცი, რას ნიშნავს იყო პოლიციელი, მე ვიცი, რას ნიშნავს იყო პოლიციელის ოჯახის წევრი. მე ვიცი, რას ნიშნავს ყოველ დღე, შენი სიცოცხლის რისკის ფასად, იბრძოდე სხვა ადამიანების სიცოცხლისა და უსაფრთხოების დასაცავად და თავს არ ზოგავდე ამისთვის. მე ვიცი, რას ნიშნავს გეღუპებოდეს თანამებრძოლი. მე ისიც ვიცი, რა გრძნობაა, როდესაც ბოროტებაზე იმარჯვებ. ვიცი, რა გამოწვევების წინაშე დგეხართ ყოველ დღე და არ ეპუებით. ისიც კარგად ვიცი, რამხელა მოტივაცია და სიამაყეა, როდესაც შენი პროფესია გაძლევს საშუალებას, იზრუნო ადამიანებზე და მათ სიმშვიდეზე. კარგად მესმის, როგორი პასუხისმგებლობაა, გერქვას პოლიციელი".

მღებრიშვილმა ასევე გაიხსენა ის პოლიციელები, რომლებიც სამსახურებრივი მოვალეობის შესრულების დროს დაიღუპნენ და მათ ოჯახებს გვერდში დგომას დაპირდა. ამის შემდეგ დამსწრე საზოგადოება ფეხზე წამოდგა და დაღუპულ სამხედროებს წუთიერი დუმილით მიაგო პატივი.