პირველად ისტორიაში, მეცნიერებმა ჩვენს მეზობელ ორ გალაქტიკას შორის არსებული მაგნიტური ხიდი დააფიქსირეს.

ე.წ. მაგელანის ხიდი წყალბადის ნაკადია, რომელიც 75 ათასი სინათლის წელიწადის სიგრძისაა და მაგელანის დიდ ნისლეულსა და მაგელანის პატარა ნისლეულს შორის გადის.

მაგელანის დიდი და პატარა ნისლეულები ჯუჯა გალაქტიკებია, რომლებიც ირმის ნახტომის გარშემო ბრუნავენ. მაგელანის დიდი ნისლეული დედამიწიდან 160 ათასი სინათლის წელიწადითაა დაშორებული, ხოლო პატარა - 200 ათასით.

მაგელანის ხიდი, მაგელანის ნაკადში არ უნდა აგვერიოს - ეს უკანასკნელი, გაზის ნაკადია, რომელიც ზემოთხსენებულ ჯუჯა გალაქტიკებს ირმის ნახტომთან აკავშირებს.

მეცნიერები ასეთი მაგნიტური ნაკადის არსებობას აქამდეც ვარაუდობდნენ, მაგრამ მისი დაფიქსირება და შესაბამისად, არსებობის დადასტურება, პირველად შეძლეს.

ახლა ასტრონომები არამარტო ამ ხიდის წარმოშობის პროცესს შეისწავლიან და დაადგენენ, არამედ გაარკვევენ მის ეფექტს მაგელანის დიდ და პატარა ნისლეულებზე.