კალიფორნიის შტატში დონატების მაღაზიის მძარცველი დანაშაულის ადგილზე დაბრუნდა, რადგან მიხვდა, რომ იქ თავისი გასაღები დარჩა. ინციდენტი Johnny Doughnuts-ის ერთ-ერთ ფილიალში მოხდა და მძარცველმა ფული მოიპარა.

ადგილობრივმა პოლიციამ ფეისბუქზე დონატების მაღაზიის ვიდეოკამერის ჩანაწერი გაავრცელა, რომელშიც მძარცველი ჩანს. ის ოფისში რამდენიმე წუთის განმავლობაში მოძრაობს და სხვადასხვა ნივთს ამოწმებს. მძარცველის ამოცნობის შემთხვევაში, პოლიციამ ვიდეოს მაყურებლებს დახმარებაც სთხოვა.

"გამოძიების მიზანია, დაადგინოს, თუ რატომ შეარჩია მძარცველმა ეს კონკრეტული ბიზნესი", — ამბობს ადგილობრივი პოლიციის ერთ-ერთი ოფიცერი. რაც შეეხება მაღაზიის მეპატრონეს, მისი თქმით, მოხარულია, რომ არც ერთი თანამშრომლის სიცოცხლეს საფრთხე არ დამუქრებია.

"ეს სამწუხარო ინციდენტია, მაგრამ მოხარულები ვართ, რომ ჩვენი გუნდის წევრები არ დაშავებულან", — განაცხადა დონატების მაღაზიის მეპატრონემ. პოლიციის თქმით, მძარცველმა დონატების საცხობის ავტომობილის გასაღებიც წაიღო, თუმცა თავად ავტომობილი არ მოუპარავს.