ყველაფერი იმით დაიწყო, რომ ამერიკელმა ტელევარსკვლავმა და ბიზნესვუმენმა, კაილი ჯენერმა, ინსტაგრამზე თავის "სთორიში" ნახევრად ხუმრობით შექმნილი პოსტი გააზიარა — "დაუბრუნეთ ინსტაგრამს ინსტაგრამობაო". იმავე პოსტში სოციალური ქსელის ხელმძღვანელობისადმი მოთხოვნა იყო: "შეწყვიტეთ ტიკტოკის მიბაძვა, მე მხოლოდ ჩემი მეგობრების საყვარლობა ფოტოების ნახვა მსურს. პატივისცემით, ყველა".

პოსტის პათოსის გასამძაფრებლად, კაილიმ იქვე მიაწერა, "გთხოოოოოოოვთო".

ფოტო: kyliejenner / Instagram

თხოვნის შედარებით მოკრძალებული ზომით, თუმცა, იმავე პოსტით გამოხატა ინსტაგრამის ამჟამინდელი ფორმით უკმაყოფილება კაილის დამ, კიმ კარდაშიანმა. სხვათა შორის, კიმსა და კაილის ერთად ჯამში 687 მილიონი გამომწერი ჰყავთ, რის გამოც, როგორც ჩანს, ინსტაგრამის ხელმძღვანელობამ მათი აზრის გათვალისწინება გადაწყვიტა.

პლატფორმის აღმასრულებელმა დირექტორმა, ადამ მოსერიმ, სულ ცოტა ხნის წინ ვიდეომიმართვა გაავრცელა და მოსალოდნელი ცვლილებები დააანონსა.

მოსერის თქმით, ბევრი ადამიანისგან ესმის, რომ მათ ინსტაგრამზე ვიდეოების სიჭარბე და ფოტოების რაოდენობის შემცირება აწუხებთ.

"ვაპირებთ, ფოტოების მხარდაჭერა გავაგრძელოთ", — აგრძელებს პლატფორმის ხელმძღვანელი, — "ეს ხომ ჩვენი მემკვიდრეობის ნაწილია".

თუმცა, მოსერი, რომელიც წინათ ფეისბუქს ხელმძღვანელობდა, აღნიშნავს, რომ ინსტაგრამის ვიდეოგაზიარების პლატფორმად ქცევის საშიშროება არ არსებობს — იმის მიუხედავად, რომ ფოტოების მხარდაჭერასთან ერთად, ამგვარი მიმართულების განვითარებაც სჭირდებათ.

მოსერი ასევე შეეხო ინსტაგრამის "რეკომენდაციების" ფუნქციას და განაცხადა, რომ მის გაუმჯობესებასაც აპირებენ. მისი თქმით, ეს სივრცე ერთ-ერთი ყველაზე ეფექტური და მნიშვნელოვანი საშუალებაა, რათა კონტენტის შემქმნელები მეტმა ადამიანმა გაიცნოს.

ვიდეოს დასასრულს, ადამმა მომხმარებლებს გამოხმაურება სთხოვა. ჰოდა, უკუკავშირმაც არ დააყოვნა — მოდელმა კრისი ტეიგენი იქვე შეურთდა კარდაშიან-ჯენერების მოთხოვნას და განაცხადა, "ვიდეოების შექმნა სულაც არ გვინდაო". მომხმარებელთა ნაწილი ასევე აღნიშნავს, რომ ყველაფრის ეგრეთ წოდებულ რილსებად (გრძელი ვიდეოები ინსტაგრამზე) ქცევით, აპლიკაცია რეკლამირების პლატფორმად უფრო იქცა.