ბაჩანა შენგელიას თქმით, გეგმავს დასკვნის დეტალურად გაცნობის შემდეგ, მიმართოს პროკურატურას ახლად გამოვლენილი გარემოების გამო, გამოძიების განახლების მოთხოვნით. მანვე აღნიშნა, რომ სწორედ ამაზე საუბრობს სამი წელია, რაც არასამთავრობოებმა გამოაქვეყნეს.

რატომ არის მნიშვნელოვანი: გავრცელებული ფაილების ავთენტურობა დადასტურებული არ არის, თუმცა გოგაშვილი სუს-ის ყოფილი უფროსია და არაერთხელ უთქვამს, რომ ჰყავს წყაროები და აქვს წვდომა კონკრეტულ ინფორმაციაზე.

• აღსანიშნია, რომ გოგაშვილი 16 ივლისს სპეცოპერაციით დააკავეს — მანამდე, 15 ივლისს კი პოსტი გამოაქვეყნა, სადაც თვითმმართველობის არჩევნების დროს გაყალბების მტკიცებულებებზე ისაუბრა.
• დაკავების შემდეგ მისმა ადვოკატმა განაცხადა, რომ ეს დოკუმენტები ყველა შესაბამის ორგანიზაციას, მათ შორის, დიპლომატიურ კორპუსსა და მედიას გადასცეს და გასაჯაროვდებოდა.
• ფაილები NGO-ებმა დღეს გამოაქვეყნეს — ის შეიცავს ჩანაწერებს რომლებშიც ჩანს, რომ სავარაუდოდ, სახელმწიფო უწყებები აგროვებდნენ პირად ინფორმაციას საჯარო სექტორში დასაქმებულებზე, სამომავლოდ მათზე ზეწოლის მიზნით.

დეტალები: დოკუმენტებში საჯარო სკოლების დირექტორების, საგანმანათლებლო რესურს-ცენტრების ხელმძღვანელების და სხვადასხვა საბიუჯეტო ორგანიზაციის თანამშრომლების პოლიტიკური დახასიათებები და რეკომენდაციები იყო.

• დოკუმენტებიდან გამოიკვეთა, რომ, სავარაუდოდ, მმართველ პარტიასთან ერთად ამ სისტემის შემსრულებლები, მათ შორის, სავარაუდოდ, მაშინდელი იუსტიციის მინისტრის მოადგილე გიორგი პატარიძე და შსს-ს გენერალური ინსპექციის უფროსი ალექსანდრე ხოჯევანიშვილი იყვნენ.

შენგელიას განცხადებით, სწორედ ისეთ საკრალურ ჩანაწერებს შესწირეს ადამიანის სიცოცხლე, როგორიცაა "პარტიის მოსაზრება უარყოფითი".

• "ამ ყველაფრის ავტორი და შემსრულებელი უნდა დაისაჯოს უმკაცრესად, თუ გვინდა, რომ ოდესმე ჩვენ სახელმწიფო გვქონდეს".
• "ვისაც ჰქონია, რომ ეს იას საქმეზე ჩადენილი დანაშაული ვინმეს შერჩება, ძალიან ცდებით. როგორც ხედავთ ხელისუფლების მიერვე შექმნილი მტკიცებულებები და ჩანაწერები არსებობს, თან დარწმუნებული ვარ, ეს ზღვაში წვეთია. ურმით, მაგრამ აუცილებლად მოვა, დაელოდეთ".

ია კერზაია 2018 წელს ინსულტის დიაგნოზით საავადმყოფოში გადაიყვანეს, თუმცა მისი გადარჩენა ვერ მოხერხდა და ის 9 დეკემბერს გარდაიცვალა.

• მანამდე ის ჰყვებოდა, რომ მას შემდეგ რაც არჩევნებში პედაგოგების ჩართვაზე უარი თქვა, ანონიმური წერილის საფუძველზე სკოლაში გენერალური ინსპექციის ორი თანამშრომელი ჩავიდა და სკოლა შეამოწმა.
• რუსთავი 2-ის ინფორმაციით, შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი. ამ მიზეზის გამო კი თანამდებობიდან დირექტორის გათავისუფლებას აპირებდნენ.
• სკოლის დირექტორზე ზეწოლაზე საუბრობენ გარდაცვლილის ოჯახის წევრები და ოპოზიცია.
• 2019 წლის 23 აგვისტოს პროკურატურამ განცხადება გაავრცელა, რომ ია კერზაიას გარდაცვალების საქმეზე გამოძიება შეწყდა — მიზეზად "დანაშაულის არარსებობას" ასახელებდა.

ფაილებზე კომენტარი გააკეთა კახა კალაძემ და "ძალიან დიდ სისულელე" უწოდა.

• თბილისი მერმა საუბრისას ისრების გადატანა სცადა და განაცხადა, რომ არჩევნების გაყალბებაზე თუ უნდა დაიწყოს გამოძიება და თუ რაიმე კითხვის ნიშანი არსებობს, ეს არის ISFED-ის პარალელური დათვლები.