საქართველოს პროკურატურასა და ცენტრ პოინტის საქმეზე ბრალდებულ ივანე ცაგურიას შორის საპროცესო შეთანხმება გაფორმდა.

პროკურატურის განცხადებით, ცაგურიამ სრულად დაუბრუნა შპს ცენტრ-პოინტ ჯგუფს 23 დასახელების ქონება, რაც დამტკიცდა თბილისის საქალაქო სასამართლოს 2017 წლის 3 მაისის განაჩენით.

ბრალდებულს, 205-ე პრიმა მუხლის მე-2 ნაწილით და მე-3 ნაწილით (ქონების გადამალვის ეპიზოდი), გათვალისწინებული დანაშაულის ჩადენისთვის და სასჯელის სახედ განესაზღვრა ჯარიმა.

ივანე ცაგურია დიდი ოდენობით თანხების მოტყუებით დაუფლებაში დახმარების, დიდი ოდენობით თანხების უკანონო მითვისების და ქონების გადამალვისთვისაა ბრალდებული.

წარდგენილი ბრალდების მიხედვით, 2010 წლის 7 სექტემბერს ერთის მხრივ მაია რჩეულიშვილს, ვახტანგ რჩეულიშვილს და რუსუდან კერვალიშვილს, ხოლო მეორეს მხრივ შპს დექსუსს შორის გაფორმდა საკუთრების მინდობის ხელშეკრულება, რომლითაც შპს დექსუსს მართვისა და განკარგვის უფლებით გადაეცა ცენტრ-პოინტის საკუთრებაში არსებული აქტივები.

ბრალდების მხარის მტკიცებით, 2013 წლის 4 მარტს მაია რჩეულიშვილმა, რუსუდან კერვალიშვილმა და ვახტანგ რჩეულიშვილმა შპს დექსუსისგან მოითხოვეს საკუთრების მინდობის ხელშეკრულების გაუქმება და გადაცემული აქტივების დაბრუნება:

"იმისთვის, რომ თავიდან აეცილებინათ სრული აქტივების დაბრუნება, 2013 წლის ხუთ და შვიდ მარტს, ივანე ცაგურიამ გააფორმა თვალთმაქცური გარიგებები, რომლითაც დაახლოებით ორი მილიონი აშშ დოლარის ღირებულების აქტივი უსასყიდლოდ გადაეცა შპს დექსუსს. აღნიშნული ქონება, ვალდებულებებისგან თავიდან არიდების მიზნით, შეიტანეს შპს დექსუსის დაფუძნებული კომპანიის - ალიანს კაპიტალის საწესდებო კაპიტალში".

პროკურატურა აცხადებს რომ სასამართლოში ივანე ცაგურიამ მზაობა გამოთქვა, აენაზღაურებინა მისი ქმედების შედეგად გამოწვეული ზიანი, რაც მდგომარეობდა 2013 წლის მარტის თვეში ქონების გადამალვის გზით დაუფლებული შპს ცენტრ-პოინტ ჯგუფის საკუთრებაში შემავალი დაახლოებით ორი მილიონი აშშ დოლარის ღირებულების 23 დასახელების ქონების დაბრუნებაში.

როგორც საგამოძიებო ორგანო წერს, ბრალდებულების მხრიდან დაზარალებულისთვის მიყენებული ზიანის სრულად ანაზღაურების შემთხვევაში, ისინი მზად იყვნენ მათთან გაეფორმებინათ საპროცესო შეთანხმება.

პროკურატურა აცხადებს, რომ ისინი აგრძელებენ შპს ცენტრ-პოინტ ჯგუფის შემადგენლობაში შემავალი კომპანიების საქმიანობის შესწავლას:

"გამოიკვეთა ყოფილი დირექტორების მხრიდან მენაშენეთა მიერ შეტანილი დიდი ოდენობით თანხების მოტყუებით დაუფლების ფაქტები. თუმცა, იმის გათვალისწინებით, რომ მათ სრულად აანაზღაურეს ზიანი მთლიანობაში 441 000 ლარის ოდენობით, რაც შეიძლება გამოყენებული იქნას დაუსრულებელი მშენებლობების დასამთავრებლად. ზემოხსენებულ პირებთან გაფორმდა განრიდება და გამოტანილ იქნა დადგენილება სისხლისსამართლებრივი დევნის არდაწყების შესახებ".