KAUST-ის მეცნიერებმა განავითარეს ნანოტექნოლოგიების პლატფორმა, რომელსაც ძვლების დეგენერაციული დაავადებების განკურნება შეუძლია.

ტექნიკა ეფუძნება რკინის სადენებს, რომელიც მაგნიტური ველის ზეგავლენით იღუნება. ძვლის ამგები ღეროვანი უჯრედები, რომლებიც ამ პატარა სადენებზეა გამოყვანილი, ამ მოძრავ სუბსტრატზე ერთგვარად ვარჯიშდება. შედეგად, ღეროვანი უჯრედები უფრო მალე გადაიზრდება ზრდასრული ადამიანების ძვალში, ვიდრე ეს კონვენციური კულტივირების შემთხვევაში ხდება — რამდენიმე კვირის ნაცვლად მათ რამდენიმე დღე სჭირდებათ. კვლევა Journal of Nanobiotechnology-ში გამოქვეყნდა.

"ეს გასაოცარი აღმოჩენაა", — ამბობს ჯასმენ მერზაბანი, ბიომედიცინის ასოცირებული პროფესორი. "ახლა ჩვენ მოკლე დროში შეგვიძლია ძვლის უჯრედების ეფექტური გამოყვანა", ეს კი პოტენციურად გვიკვალავს გზას ძვლის რეგენერაციისკენ.

მეცნიერებმა გააანალიზეს თავიანთი ნანოსადენების კარკასის შესაძლებლობა, წარმოქმნას ძვალი მაგნიტური ველის ზეგავლენით და მის გარეშე. მათ ამ სადენებისგან თანაბარუჯრედებიანი ბადე შექმნეს და მასზე დაიტანეს ადამიანის მეზენქიმალური ღეროვანი უჯრედები (MSC).

მეცნიერებმა აღმოაჩინეს, რომ დაბალი სიხშირის მაგნიტური ველის დამატებით დიდად ჩქარდება ძვლის ფორმირების პროცესი. მექანიკური სტიმულაციის ორდღიანი ინკუბაციის შემდეგ ძვლის განვითარების გენეტიკური მარკერები აქტიურდება მაშინ, როდესაც ძვლის უჯრედების განახლების მარკერები არააქტიურ ფაზაში გადადის.

KAUST-ის გუნდის წევრები შემდეგ ეტაპზე გეგმავენ, თავიანთი სისტემა თაგვების ძვლის დეგენერაციულ დაავადებებს მოარგონ იმ იმედით, რომ შეძლებენ ამ ღეროვანი უჯრედების ნანოსადენების კარკასის მოთავსებას დაზიანებულ ადგილებში, რაც ხელს შეუწყობს ქსოვილების აღდგენას. გარედან გამოყენებული მაგნიტური ველი კი შეხორცებას კიდევ უფრო მეტად დააჩქარებს.

კვლევის ერთ-ერთი ავტორი ხოსე პერეზი ფიქრობს, რომ შესაძალებლია ინოვაციის სხვა დაავადებებისთვისაც მორგება. ის აღნიშნავს: "ნანოსადენების სიგრძისა და დიამეტრის ცვლილებით შეიცვლება ასევე მთლიანი კარკასის დრეკადობაც, რაც განსხვავებულად ასტიმულირებს ადამიანის მეზენქიმალურ ღეროვან უჯრედებს, შესაბამისად, წარმოქმნილი იმპულსიც განსხვავებული იქნება".

მათ შეუძლიათ ამ ტექნიკისა და სხვა დამატებითი უჯრედების გამოყენება, მაგალითად თავის ტვინში მკვდარი ნეირონების აღსადგენად ან ახლის წარმოსაქმნელადაც კი. ამ მართლაც ძალიან პატარა, ნანოტექნოლოგიით უამრავი შესაძლებლობის კარი იღება.