საქართველოს პარლამენტის თავჯდომარე ირაკლი კობახიძე ეროვნულ-დემოკრატიული ინსტიტუტის (NDI) მიერ დღეს გამოქვეყნებულ კვლევას უნდობლობას უცხადებს, რადგან მიიჩნევს, რომ შედეგებსა და ქვეყანაში არსებულ რეალობას შორის რადიკალური სხვაობაა.

"სამწუხაროდ, დღემდე ვერ მოიპოვა ნდობა იმ კვლევებმა რომელიც ტარდება კავკასიის კვლევითი რესურსების ცენტრის (CRRC) მიერ და ამის მთავარი მიზეზი არის რადიკალური აცდენა მათ შედეგებსა და იმ რეალობას შორის, რომელიც არის ჩამოყალიბებული ჩვენს ქვეყანაში. მათ შორის, გახსოვთ, რომ საარჩევნო კუთხითაც არის მუდმივად აცდენილი ეს კვლევები იმ რეალობას, რომელიც გვაქვს ქვეყანაში" - ამბობს კობახიძე.

დღეს NDI-იმ ახალი კვლევა გამოაქვეყნა. კვლევის საველე სამუშაოების NDI-ის დაკვეთით CRRC-იმ 2017 წლის 7-28 აპრილის პერიოდში ჩაატარა. გამოკითხულია 2 493 მოქალაქე. ისინი წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოიკითხნენ. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.