წელს Tbilisi Open Air-ის დრესკოდი ლურჯი და ყვითელი იყო. 27 ივნისს ხალხს, რომელიც ომის დაწყების შემდეგ უკრაინისადმი მხარდაჭერის გამოსახატად არაერთხელ გამოვიდა აქციაზე, წინააღმდეგობის სიმბოლოდ ქცეული შემსრულებლები უმღეროდნენ.

რატომ არის მნიშვნელოვანი: გარდა მუხტისა და განწყობისა, Okean Elzy-ის გამოსვლა სოლისტის, სვიატოსლავ ვაკარჩუკის კომენტარებმაც გახადა განსაკუთრებული.

• მან ჯერ კიდევ კონცერტის დაწყებამდე მედიასთან დააანონსა, რომ აპირებდა ბევრჯერ გადაეხადა ხალხისთვის მადლობა იმ უპირობო მხარდაჭერისთვის, რასაც ისინი გასცემდნენ უკრაინელების მიმართ.

რა თქვა ვაკარჩუკმა: უპირველეს ყოვლისა, ვაკარჩუკმა პირობა არათუ შეასრულა, გადააჭარბა. ამბობდა, რომ მადლობას კიდევ 10-ჯერ გადაიხადა, ლისზე შეკრებილმა ხალხმა კი მისგან ეს სიტყვები ბევრად მეტჯერ მოისმინა — ქართულად, ინგლისურად და უკრაინულად.

• გამოსვლის დასაწყისში მომღერალმა თქვა, რომ ეს ბენდის ცხოვრებაში, მათ კარიერაში ერთ-ერთი ყველაზე მნიშვნელოვანი ღამე იყო, რადგან მათ ქვეყანაში დიდი ომის დაწყების შემდეგ პირველ კონცერტს მართავდნენ.
• ამისათვის კი "საყვარელი დებისა და ძმების ქვეყანაში" ჩავიდნენ.
• მანვე თქვა, რომ ომი არ სურდათ და არ დაუწყიათ, მაგრამ აუცილებლად გაიმარჯვებენ.

გარდა ამისა, ვაკარჩუკმა შეკრებილ საზოგადოებას სთხოვა, არ დაევიწყებინათ უკრაინელი გმირები, განსაკუთრებით ისინი, ვინც მარიუპოლს იცავდნენ.

• ბენდმა მათ სიმღერა მიუძღვნა, სოლისტმა კი აღნიშნა 27 ივნისი აზოვის ბატალიონის მეთაურის, დენის პროკოპენსკოს დაბადების დღეა.
• მებრძოლის, რომელმაც თვეების განმავლობაში იცავდა მარიუპოლს, ახლა კი რუსეთის ტყვეა.

ოდესიდან ბათუმამდე: სვიატოსლავ ვაკარჩუკმა ერთი ფრაზით შეამცირა მანძილი, რომელიც ორ მეგობარ ქვეყანას ერთმანეთისგან ყოფს.

• მათთვის, ვისაც ჰგონია, რომ ომი სადღაც სხვაგან, შორს მიმდინარეობს, "ოდესიდან ბათუმამდე შექმნილმა ტალღამ" შექმნა განცდა, რომ ამ ორ ქვეყანას შორის არასახმელეთო კავშირი, სხვა მეზობელთან სახმელეთო კავშირზე უფრო ძლიერია.

ერთად ევროკავშირში: ბენდის სოლისტმა საქართველოში შეკრებილ ხალხს უთხრა ის, რისი მოსმენაც, ალბათ ყველაზე მეტად სურდათ.

• "უკრაინა და საქართველო მალე გახდებიან ევროპული ოჯახის სრულფასოვანი წევრები".

პატარა უკრაინა თბილისში და თბილისო უკრაინისგან: პატივისცემის გამოხატვა იმ მარტივი ჟესტით არ დასრულებულა, რომ მომღერალმა რამდენიმე ქართული ფრაზა ისწავლა.

• უკრაინის დროშებით მისულ საქართველოსა და უკრაინის მოქალაქეებს ვაკარჩუკმა ქართულადაც უმღერა.
• Okean Elzy-ს მიერ შესრულებული თბილისო ქართველი და უკრაინელი ხალხის სამუდამო მტკიცე მეგობრობის კიდევ ერთი მნიშვნელოვანი გამოხატულება იყო.

საბოლოოდ, Okean Elzy-ს კონცერტის მუხტმა კიდევ ერთხელ დაამტკიცა ის, რომ მიუხედავად ყველაფრისა, ქართველებისა და უკრაინელების მეგობრობა კითხვის ნიშნის ქვეშ არ დგას. ტალახისგან დაბინძურებული ხალხი სახლში წავიდა იმედით, რომ ამ მესიჯს სვიატოსლავ ვაკარჩუკი უკრაინელებთან ჩაიტანს.