ტყიბულში მეშახტეების გაფიცვა მას შემდეგ შეწყდა, როდესაც პროფკავშირის, საწარმოსა და სახელმწიფოს წარმომადგენლებს შორის 4 საათიანი შეხვედრა დასრულდა. მოლაპარაკება 29 თებერვალს, შუაღამისას დამთავრდა.

არასამთავრობო ორგანიზაცია EMC-ის ცნობით, საწარმომ გაფიცულებს ხელფასის დაუყოვნებლივ 7%-ით გაზრდა შესთავაზა, აპრილის დასაწყიში კი, მათ ხელფასს დამატებით 3%-ით გაუზრდიან. ასევე, საწარმო თანახმაა, გაცდენილი დღების ნაწილი აანაზღაუროს, ნაწილს კი საშვებულებო დღედ გააფორმებს. აგრეთვე, გადაიხედება შრომის პირობები.

ორგანიზაციის ინფორმაციით, შეთანხმების პროცესს მხოლოდ საგაფიცვო კომიტეტი და გაფიცულების მცირე ნაწილი ესწრებოდა, ისინი აღნიშნულ შეთავაზებას დათანხმდნენ.

"დანარჩენი გაფიცულებისთვის ამ შეთავაზების შესახებ უცნობია, რადგან მოლაპარაკების დასრულებისას ადგილზე არ იმყოფებოდნენ. კომპანიის შეთავაზებას დათანხმებული მეშახტეები ვალდებულნი არიან ხვალ 12 საათიდან სამუშაოს დაუბრუნდნენ"- აცხადებს EMC-ს იურისტი.

ტყიბულში მეშახტეები 16 დღის განმავლობაში იყვნენ გაფიცული. ისინი ხლეფასების 40%-იან ზრდას და სამუშაო პირობების გაუმჯობესებას მოითხოვდნენ. მეშახტეთა მხარდამჭერი აქციები იმართებოდა საქართველოს სხვადასხვა ქალაქში.