თიბისიმ გაეროს, ევროკავშირისა და შვედეთის მთავრობის მიერ მხარდაჭერილ კონფერენციაში მიიღო მონაწილეობა, რომელიც ზრუნვის ეკონომიკის მშენებლობისა და ოჯახის მხარდაჭერის გენდერულად მგრძნობიარე პოლიტიკის საქართველოში დანერგვას ემსახურებოდა.

კონფერენცია გაეროს ორი სააგენტოს — გაეროს განვითარების პროგრამისა (UNDP) და გაეროს მოსახლეობის ფონდის (UNFPA) ორგანიზებით გაიმართა. კონფერენციაზე გამართული მსჯელობა ისეთ საკითხებს შეეხო, როგორებიცაა სამუშაოსა და ოჯახური ცხოვრების შეთავსება, თანამშრომლების უფლებების და კეთილდღეობის დაცვა მათთვის მშობლის შვებულების ღირსეული პირობების შექმნით, გენდერული როლების ზეგავლენა საოჯახო საქმიანობასა და კარიერულ გზაზე, სამუშაო ადგილზე გენდერული თანასწორობის ხელშეწყობა და ქალთა ეკონომიკური გაძლიერება.

ზრუნვის პოლიტიკისა და ოჯახის მხარდამჭერი პოლიტიკის განხოციელებაში კერძო სექტორი განსაკუთრებულ როლს ასრულებს. სექტორში არსებული საუკეთესო პრაქტიკებისა და გამოწვევების შესახებ თიბისის აღმასრულებელი დირექტორის მოადგილემ, ნინო მასურაშვილმა ისაუბრა. მან თიბისის მიერ მხარდაჭერილი და დანერგილი პროექტებიც აღნიშნა, რომლებიც ქალთა გაძლიერებას ემსახურება. ასევე, აუდიტორიას გააცნო თიბისი, როგორც კომპანია, რომელმაც მმართველ საბჭოსა და ლიდერულ პოზიციებზე ქალების 45.5%-იანი წარმომადგენლობით, 2021 წლის FTSE 250 რეიტინგში საბანკო სექტორის წარმომადგენელ კომპანიებს შორის პირველი ადგილი დაიკავა. ნინო მასურაშვილმა თიბისის ღირებულებები და შიდა პოლიტიკა განმარტა, რომელიც თანამშრომლების მუდმივ განვითარებაზე ორიენტირებას და კომფორტული სამუშაო გარემოს შექმნას გულისხმობს.

"ჩვენთვის კონფერენციაში მონაწილეობის მიღება მნიშვნელოვანია, რადგან თანამშრომლებისთვის ღირსეული, თანასწორი და განვითარებაზე ორიენტირებული სამუშაო გარემოს შექმნაზე მუდმივად ვზრუნავთ. ვინაიდან თიბისიში დასაქმებული თანამშრომლების 71% ქალია, ნებისმიერი პოლიტიკისა და მიდგომის შემუშავების პროცესში მნიშვნელოვანია ქალებზე ზრუნვა და სამუშაო გარემოში და მის გარეთ მათი საჭიროებებისა და ვალდებულებების გათვალისწინება. თიბისიში ოჯახზე მორგებული პოლიტიკის ერთ-ერთი უმნიშვნელოვანესი მიზანია ქალებისა და კაცების თანასწორი კარიერული განვითარებისა და მათი შრომითი პოტენციალის რეალიზების მხარდაჭერა. თიბისიში ქალები სულ უფრო მეტად საქმდებიან ისეთ სფეროებში, რომლებშიც აქამდე, ძირითადად კაცები იყვნენ წარმოდგენილნი. ასეთებია რისკების მართვა და საინფორმაციო და საკომუნიკაციო ტექნოლოგიები (ICT)", — განმარტავს ნინო მასურაშვილი.

"ამ მიმართულებებში ქალების ჩართულობის გასაზრდელად თიბისი ახორციელებს როგორც შიდა, ისე არაერთ გარე ინიციატივას. ასეთებია ჩვენი IT აკადემია, გრეის ჰოპერის დაჯილდოება, პროგრამა "500 ქალი ტექნოლოგიებში" და სხვა. გარდა ამისა, თიბისიში თანამშრომლები სარგებლობენ მშობლის ანაზღაურებადი შვებულებით მათი სრული ანაზღაურების განაკვეთის საფუძველზე 183 ან 200 დღის განმავლობაში. ჩვენთან თანამშრომლებს მშობლის შვებულებით სარგებლობა შეუძლიათ როგორც შვილად აყვანის, ასევე სუროგაციის დროსაც. დამატებით, ჩვენ გვაქვს მრავალშვილიანი და ახალდაქორწინებული თანამშრომლების ფინანსური მხარდაჭერის და სპეციალური საშეღავათო პროგრამები", — დაამატა მან.

თიბისი აქტიურად არის ჩართული ქალთა გაძლიერების, დასაქმებისა და სხვადასხვა უნარების გამომუშავების ხელშემწყობ პროექტებში. თიბისისთვის მნიშვნელოვანია ქალთა როლის ზრდა, გაძლიერება და გენდერული თანასწორობის პროაქტიული და თანმიმდევრული ინტეგრაცია საქმიანობის ყველა ასპექტში, იქნება ეს ორგანიზაციის შიგნით, ბაზარზე თუ ზოგადად საზოგადოებაში.