თბილისის მოქალაქეები მეტროსადგურ გოცირიძით სარგებლობას ისევ ვერ შეძლებენ. ამჯერად, მეოთხედ გადადების შემდეგ, სატრანსპორტო კომპანიაში გვეუბნებიან, რომ გახსნა კიდევ კიდევ სამი თვით გაიწელა.

რატომ არის მნიშვნელოვანი: სარემონტო-სარეკონსტრუქციო სამუშაოების გამო მეტროსადგური 2021 წლის თებერვალში დაიკეტა. მერიაში ამბობდნენ, რომ მეტრო მგავრებს 3 თვე ვერ მოემსახურებოდა.

  • 2021 წლის დეკემბერში კი კალაძემ თქვა, რომ რეაბილიტაცია 7 თვეში დასრულდებოდა.
  • 2022 წლის თებერვალში მერიაში აცხადებდნენ, რომ მეტრო მგზავრებს მაისიდან მოემსახურებოდა.
  • უკვე 9 მაისს მერიაში თქვეს, რომ მეტროსადგურის გახსნა, შესაძლოა, კიდევ ერთი თვით გადადებულიყო, თუმცა ზუსტ თარიღს ვერ აკონკრეტებდნენ.

რას ამბობენ სატრანსპორტო კომპანიაში: On.ge-ს განუცხადეს, რომ მეტროს გარკვეულ უბანს დამატებითი კვლევები დასჭირდა, რამაც რეაბილიტაციის დასრულება "დროში გაწელა".

  • "ვგეგმავთ, რომ მგზავრთა მიღებას განვაახლებთ აგვისტოს თვეში", — აცხადებენ ისინი.

არქივიდან: სადგურის დაზიანების შესახებ დასკვნა 4 წელზე მეტია არსებობს. ექსპერტიზის დასკვნით, მეტროსადგურს არაერთი დაზიანება ჰქონდა.

თუმცა, სატრანსპორტო კომპანიაში 2019 წელს აცხადებდნენ, რომ მეტროთი მგზავრობა "იმდენად უსაფრთხოა", რომ გამაგრებით სამუშაოებს არ გეგმავდნენ.

  • სარემონტო-სარეკონსტრუქციო სამუშაოების დაწყების შემდეგ მერიამ ტენდერი არაერთხელ გამოაცხადა — მათგან რამდენიმე არ შედგა, რადგან მონაწილეობა არავინ მიიღო.
  • ერთ შემთხვევაში კი მონაწილე კომპანიას დისკვალიფიკაცია მიენიჭა.
  • პროექტის ბიუჯეტი 4 700 000 ლარია.