HBO-ის ერთ-ერთი პოპულარული სერიალი Raised By Wolves მეორე სეზონით დასრულდა — რიდლი სკოტის სერიალის მესამე სეზონს ვეღარ ვნახავთ.

"მიუხედავად იმისა, რომ Raised by Wolves-ის მესამე სეზონს აღარ გამოვუშვებთ, უზომოდ მადლიერი ვართ ჩვენი ბრწყინვალე მსახიობებისა და ჯგუფის, შემქმნელების — აარონ გუზიკოვსკის, რიდლი სკოტის, დეივიდ ცუკერისა და Scott Free Productions-ის მთელი გუნდის მშვენიერი ხელოვნებისა და უჩვეულო შესაძლებლობისთვის, რომლითაც ფანები კეპლერ-22ბ-ის სამყაროში ამოგზაურეს", — ვკითხულობთ HBO-ის განცხადებაში.

სერიალის სიუჟეტი ერთ მისტიკურ პლანეტაზე ვითარდება, სადაც ორ ანდროდს ევალება, რომ ბავშვები გაზარდონ და საფრთხისგან დაიცვან. სერიალის მეორე სეზონი თებერვალში გამოვიდა. პრემიერის დროს HBO-მ განაცხადა, რომ Raised by Wolves HBO Max-ის ნამუშევრებიდან პოპულარულობით პირველ ადგილზე იყო.

Raised by Wolves-ის გაუქმების საფრთხის შესახებ ფანებს პირველად სერიალის ვარსკვლავმა, აბუბაქარ სალიმმა ტვიტერზე აცნობა. მან გულშემატკივრებს გაანდო, რომ სერიალის გასაგრძელებლად იმედი ჯერ კიდევ არსებობდა, თუმცა ამისთვის აუცილებელი იყო, ფანებს მხარდაჭერა ხმამაღლა დაეფიქსირებინათ.

ვინ იცის, იქნებ სერიალის ფანებმა მართლაც მიაღწიონ მიზანს და Raised By Wolves-ის გაგრძელება მაინც ვიხილოთ.