ნიუ-იორკის შტატის საკანონმდებლო ორგანოს ახალმიღებული კანონით ზოომაღაზიებში ძაღლების, კატებისა და კურდღლების გაყიდვა აიკრძალება.

მიღებული გადაწყვეტილება მიზნად ისახავს შტატში ცხოველების არაეთიკურად შეჯვარების პრაქტიკის მოსპობას. ეს ტენდენცია, ძირითადად, ეგრეთ წოდებულ ლეკვების ფერმებს ეხება, სადაც ძაღლების გამრავლება კომერციული საქმიანობაა და უგულებელყოფილია ახალდაბადებული ცხოველებისა და მათი დედების საჭიროებები.

მიღებულ კანონს ახლა მხოლოდ გუბერნატორ კეთი ჰოუკულის ხელმოწერაღა სჭირდება ასამოქმედებლად. აღსანიშნავია, რომ ქვეყნის მასშტაბით ნიუ-იორკის შტატში ერთ-ერთი ყველაზე დიდი რაოდენობის ზოომაღაზიაა თავმოყრილი.

"ამ კანონით გაწყდება ჯაჭვი, რომელიც გამყიდველებსა და კომერციულ შემჯვარებლებს აკავშირებს, ამდენად ეს წარმოუდგენელი სისასტიკე დასრულდება", — აცხადებს ცხოველთა უფლებადამცველი ასოციაცია ASPCA-ის დირექტორი, მეტ ბერშედკერი.

შტატის ერთ-ერთი კანონმდებელი და ამ გადაწყვეტილების ინიციატორი, ლინდა როზენთალი აცხადებს, რომ "საყვარელი ლეკვები, კნუტები და ბაჭიები ზოომაღაზიების ვიტრინებში სასტიკ რეალობას ნიღბავენ — რომ ისინი ფერმებში საშინელი პრაქტიკის 'პროდუქტები' არიან".

როზენთალი ასევე დასძენს, რომ გავრცელებული მავნე პრაქტიკით ხშირია თანდაყოლილი დაავადებები, რაც ცხოველის პატრონს "ვეტერინარულ კლინიკებში დახარჯულ ასობით ან ათასობით დოლარად და წარმოუდგენელ სტრესად" უჯდება.

სენატის წარმომადგენელი და კანონის მხარდამჭერი მაიკლ ჯენერისი ასევე დასძენს, რომ მაშინ, როცა თავშესაფრებში პატრონს უამრავი ცხოველი ელოდება, საჭირო არაა, ადამიანმა ოთხფეხა მეგობარი ზოომაღაზიებში ეძებოს.

"ჩვენს ოთხფეხა მეგობრებს პატივისცემით უნდა მოვექცეთ და არა პროდუქტივით", — ამატებს იგი.

კანონის მიღებას დადებითად გამოეხმაურნენ ცნობილი ადამიანებიც, მათ შორის, ტელეწამყვანი ენდი კოენი, მსახიობები ედი ფალკო და ალეკ ბოლდუინი.