2022 წლის 13 ივნისიდან მიგრაციის საერთაშორისო ორგანიზაცია (IOM) საქართველოში იწყებს კამპანიას ჩვენ ვირჩევთ ტოლერანტობას — #ჩვენშისაერთომეტია.

კამპანია 5 კვირის განმავლობაში გაგრძელდება. მისი მიზანი ქსენოფობიასთან ბრძოლა, მიგრანტების უფლებების შესახებ ცნობიერების ამაღლება და დადებითი განწყობის შექმნაა. კამპანია ხორციელდება ნორვეგიის საგარეო საქმეთა სამინისტროს მხარდაჭერით და სახალხო დამცველთან თანამშრომლობით.

კამპანიის ფარგლებში მიგრაციის საერთაშორისო ორგანიზაცია საზოგადოებას გააცნობს მიგრანტების ისტორიებს, დაანახებს მათ როლს საქართველოს ეკონომიკურ გაძლიერებაში, მათ ჩართულობას ქვეყნის განვითარებაში და სხვა.

ფოტო: IOM

კამპანიის ერთ-ერთი აქტივობაა დისკუსიები, რომელიც გაიმართება სტამბაში 18, 21, 25 ივნისს. დისკუსიების სერიებს წარუძღვება მწერალი და ტელეწამყვანი - დათო გორგილაძე, დისკუსიები ასევე გაშუქდება IOM საქართველოს ფეისბუქ გვერდზე.

კამპანიის მიზანია ჩართოს საზოგადოება ქსენოფობიის წინააღმდეგ დისკუსიაში, ხელი შეუწყოს სტერეოტიპების დანგრევას და წარმოაჩინოს, თუ რამდენად მნიშვნელოვანია მიგრანტების როლი საქართველოს განვითარებაში. წარმატებული ინტეგრაცია არის დინამიური და მრავალმხრივი პროცესი, რომელიც მოიცავს მიგრანტებისა და მასპინძელი საზოგადოების ურთიერთადაპტაციას ფუნდამენტური უფლებების დაცვის, პატივისცემის, ტოლერანტობისა და არადისკრიმინაციის პრინციპებზე დაყრდნობით.

იმისათვის, რომ შეამოწმო, რამდენად ტოლერანტული ხარ, შეავსე ტესტი ამ ბმულზე, ხოლო უფრო მეტი სიახლის გასაგებად, თვალი ადევნე მიგრაციის საერთაშორისო ორგანიზაციის ახალ კამპანიას.

მიგრაციის საერთაშორისო ორგანიზაცია (IOM) იცავს მიგრანტთა უფლებებს, ღირსებას და კეთილდღეობას მთელი მსოფლიოს მასშტაბით. ორგანიზაცია საქართველოში 1993 წლიდან მუშაობს.

ჩვენ ვირჩევთ ტოლერანტობას #ჩვენშისაერთომეტია