ასურელთა მონასტრის წინამძღვარი, არქიმანდრიტი სერაფიმე ფეისბუკის პირად გვერდზე განმარტავს, თუ რატომ უმასპინძლა მონასტერში მოსკოვის ყოფილ მერს, იური ლუჟკოვს. ლუჟკოვი არაერთხელ არის ნამყოფი საქართველოს ოკუპირებულ ტერიტორიებზე, მისმა საქართველოში ვიზიტმა კი არაერთგვაროვანი რეაქციები გამოიწვია.

არქიმანდრიტ სერაფიმეს თქმით, ის მონასტერში მისულ არცერთ სტუმარს არ გააგდებს:

"ხალხნო, მაინტერესებს, ამ ლუჟკოვის ჩვენთან წირვის დასწრებაზე ამხელა აჟიოტაჟი რომ ატყდა. და თურმე, ის ყოფილა ოკუპანტი. პირველ რიგში, მე გეკითხებით თქვენ, ამ კაცს მე მივეცი ვიზა? მე მივანიჭე მას საპატიო მოქალაქეობა თბილისის და ბათუმის? თუ შემოუშვეს ჩვენს ქვეყანაში და ადამიანი მოვიდა წირვაზე დასასწრებად, მეთქვა, წადი-მეთქი აქედან? ეკლესიის კარი ღიაა ყველასთვის, პოლიტიკოსი იქნება თუ გლეხი, მაგრამ რაც მთავარია, ეკლესიაში და მის მდებარე ტერიტორიაზე პოლიტიკაზე არავის არ მივცემ უფლებას რომ ილაპარაკოს, მაგრამ გაგდებით არც არავის გავაგდებ. ჩემს აზრს ყოველთვის ხმამაღლა ვიტყვი, გინდ მტერი მოვიდეს და გინდ - მეგობარი. ეს არის ჩემი კერძო აზრი, ამიტომ თუ რომელიმე თქვენთაგანი დავაბრკოლე ,შენდობას გთხოვთ! პატივისცემით, არქიმანდრიტი სერაფიმე!"