თბილისის საქალაქო სასამართლო განმარტავს, რომ ციანიდის საქმეზე წინასასამართლ სხდომა პერსონალური მონაცემების, პირადი ცხოვრებისა და პროცესის მონაწილის უსაფრთხოების ხელყოფასთან დაკავშირებული კონკრეტული და რელევანტური გარემოებების გათვალისწინებით დაიხურა.

სასამართლოს აღნიშნავს იმასაც, რომ მიმდინარეობს გამოძიება ბრალდების მხარის ერთ-ერთი მოწმის მიმართ რელიგიური მოტივით მუქარის შემცველი სატელეფონო ზარის განხორციელების თაობაზე: "სასამართლომ მიიჩნია, რომ დასაბუთებული ვარაუდის სტანდარტით, შესაძლოა საფრთხე შეექმნათ პროცესის მონაწილეებს სხდომის საჯაროდ წარმართვის შემთხვევაში".

გავრცელებულ განცხადებაში ნათქვამია, რომ ბრალდებულ გიორგი მამალაძეს გააჩნია სხვადასხვა საპროცესო უფლება: "სასამართლო სხდომა, როგორც წესი, ტარდება ზეპირად და საჯაროდ, თუმცა აღნიშნული დათქმა არ არის იმპერატიული და აბსოლუტური, თუკი აღნიშნული იწვევს დემოკრატიულ საზოგადოებაში სხვა პირთა უფლებების, თავისუფლების და უსაფრთხოების ხელყოფას".

დღეს, 5 მაისს, თბილისის საქალაქო სასამართლომ ბრალდების მხარის შუამდგომლობა დააკმაყოფილა, რაც იმას ნიშნავს, რომ ციანიდის საქმის წინასასამართლო სხდომა დახურულ რეჟიმში წარიმართება.

დეკანოზის ადვოკატები განხილვის ღიაობას მოითხოვდნენ. თავად მამალაძემ სხდომის საჯაროობის სურვილი გამოთქვა.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.