საგარეო საქმეთა და უსაფრთხოების პოლიტიკის სფეროში ევროკავშირის უმაღლესი წარმომადგენლის, ჯოზეფ ბორელის განცხადებით, ევროკავშირმა უნდა განიხილოს რუსეთის გაყინული სავალუტო რეზერვების ჩამორთმევა და მათი ომის შემდეგ უკრაინის აღდგენისთვის გამოყენება.

ბორელმა თქვა, რომ აშშ-მ ავღანეთის ცენტრალური ბანკის კუთვნილი მილიარდობით დოლარის აქტივები ტერორიზმის მსხვერპლთა კომპენსაციისა და ქვეყნის ჰუმანიტარული დახმარებისთვის გამოიყენა. მისი განცხადებით, ლოგიკური იქნებოდა მსგავსი ნაბიჯების განხილვა რუსეთის აქტივებთან მიმართებაში.

"მე მომხრე ვარ, რადგან ეს სავსებით ლოგიკურია. ჩვენ ჯიბეებში გვაქვს ფული და ვიღაცამ უნდა ამიხსნას, რატომ არის ეს [გადაწყვეტილება] კარგი ავღანური ფულისთვის და არა რუსული ფულისთვის", — ამბობს ის.

ომის დაწყებისას ევროკავშირმა და მისმა მოკავშირეებმა გაყინეს ასობით მილიარდი დოლარის ღირებულების სავალუტო რეზერვები, რომლებიც განთავსებული იყო რუსეთის ცენტრალური ბანკის ანგარიშებზე. რუსეთმა მარტში განაცხადა, რომ ცენტრალური ბანკის სანქციებმა გაყინა დაახლოებით 300 მილიარდი დოლარი მათი ოქროსა და სავალუტო რეზერვიდან.