ევროპული საბჭოს პრეზიდენტის, შარლ მიშელის განცხადებით, დონორთა კონფერენცია, რომელიც ვარშავაში გაიმართება, უკრაინის ევროპული მარშალის გეგმის ამოსავალი წერტილი იქნება. ამის შესახებ მან Interfax-ის უკრაინულ გამოცემასთან ისაუბრა.

"ჩემი აზრით, ეს კონფერენცია უკრაინის ევროპული მარშალის გეგმისთვის ამოსავალი წერტილი უნდა იყოს. ეს ზუსტად ის არის, რაც ჩვენ უნდა გავაკეთოთ, ჩვენ უნდა გავაგზავნოთ ძალიან ძლიერი სიგნალი, რომ უკრაინას მაქსიმალურად დავუჭერთ მხარს", — თქვა მან.

კონფერენციაზე გაემგზავრა საქართველოს პრემიერმინისტრი, ირაკლი ღარიბაშვილიც. როგორც 4 მაისს საქართველოს მთავრობის ადმინისტრაციამ გაავრცელა ინფორმაცია, დელეგაციაში, რომელსაც ღარიბაშვილი ხელმძღვანელობს, საქართველოს საგარეო საქმეთა მინისტრი, ილია დარჩიაშვილიცაა.