თბილისის მერიის მუნიციპალური ინსპექციის თანამშრომლებმა მეტრო სამგორთან (ე.წ ნავთლუღი) და მეველის ქუჩიდან, ასევე, ახმეტელის თეატრის მიმდებარედ გარემოვაჭრეების დახლები აიღეს. როგორც ისინი განმარტავენ, მოვაჭრეები არაერთხელ გააფრთხილეს, რომ უნებართვო საქმიანობა შეეწყვიტათ.

"სამგორისა და ახმეტელის თეატრის მიმდებარე ტერიტორიაზე გარე ვაჭრობის პრობლემის მოგვარების მიზნით, თბილისის მერმა, კახა კალაძემ ისნისა და გლდანის რაიონის გამგებლებს ახლომდებარე ბაზრობების დირექციასთან მოლაპარაკება დაავალა, რათა გარემოვაჭრეებმა სპეციალურად გამოყოფილ სავაჭრო სივრცეებში გადაინაცვლონ. გამგეობების წარმომადგენლებისა და საკრებულოს მაჟორიტარი დეპუტატების მუშაობის შედეგად, ბაზრობის დირექცია გარემოვაჭრეებს სპეციალურ პირობებს სთავაზობს და ისინი საშეღავათო პირობებით ისარგებლებენ", — ნათქვამია განცხადებაში.

ასევე, მერიაში ამბობენ იმასაც, რომ გარევაჭრობა უკანონოდ მიწისქვეშა გადასასვლელებსა და ტროტუარებზეც მიმდინარეობს, რის გამოც, ფეხითმოსიარულეთა გადაადგილება ფერხდება.