რუსეთის საგარეო საქმეთა სამინისტროს იარაღის გაუვრცელებლობისა და კონტროლის დეპარტამენტის დირექტორმა, ვლადიმერ ერმაკოვმა განაცხადა, რომ რუსეთსა და ამერიკის შეერთებულ შტატებს შორის სტრატეგიული სტაბილურობასთან დაკავშირებული დიალოგი ფორმალურად შეჩერებულია. ინფორმაცის სამთავრობო მედია ტასი ავრცელებს.

"დღევანდელი მდგომარეობით, სიტუაცია ისეთია, რომ არ არის საჭირო აშშ-სთან სტრატეგიული სტაბილურობის შესახებ მოლაპარაკებების რაიმე პერსპექტივაზე საუბარი. სამწუხაროდ, ვაშინგტონის ყველა ქმედება მიმართულია დიამეტრალურად საპირისპირო მიმართულებით. ნებისმიერ შემთხვევაში დიალოგში და მით უმეტეს სტრატეგიულ დიალოგში აუცილებელია, მინიმუმ, ადეკვატურად მოაზროვნე პარტნიორის ყოლა. ამ დროისთვის ასეთი დიალოგი ფორმალურად "გაყინულია" ამერიკული მხარის მიერ", — თქვა მან.

ერმაკოვის თქმით, მოლაპარაკებების დაბრუნება შესაძლებელი იქნება უკრაინაში ომის "ყველა ამოცანის განხორციელების შემდეგ".

2021 წლის 16 ივნისს, ჟენევის სამიტის დასრულების შემდეგ, აშშ-სა და რუსეთის პრეზიდენტებმა ერთობლივი განცხადება გაავრცელეს, სადაც ისინი მზადყოფნას გამოთქვამენ, რომ სამომავლოდ ითანამშრომლებდნენ და დაიწყებდნენ დიალოგს ორმხრივ სტრატეგიულ სტაბილურობაზე.