ამერიკელი მოდელისა და მსახიობის, მეგან ფოქსის თქმით, ის და თავისი საქმრო, Machine Gun Kelly, ერთმანეთის სისხლს სვამენ, თუმცა, ეს შეიძლება ზოგმა არასწორად გაიგო.

"ერთმანეთის სისხლს რომ ვსვამთ, ამან ხალხი შეიძლება შეცდომაში შეიყვანოს და ჩვენ თასებით წარმოგვიდგინოს, როგორც ეს Game of Thrones-შია", — ამბობს ფოქსი, — "მარტო რამდენიმე წვეთს, თუმცა, კი, ერთმანეთის სისხლს ვიღებთ ხოლმე, მხოლოდ რიტუალური მიზნით".

ფოქსი, რომელიც აპრილის თვეში ბრიტანული Glamour-ის გარეკანზე მოხვდა, ამბობს, რომ ასტროლოგია, მეტაფიზიკური პრაქტიკა და მედიტაცია აინტერესებს.

მსახიობის თქმით, როცა ის და თავისი პარტნიორი სისხლის სმის რიტუალს ასრულებენ, ეს ერთგვარი დამაკავშირებელი გზაა, რომელსაც მიზანი აქვს.

"იგი უფრო დაუფიქრებლად და ქაოსურად მოქმედებს, მზადაა მკერდი გატეხილი მინით გადაიხსნას და მითხრას, იბოძე ჩემი სულიო", — აღნიშნავს მეგანი თავის პარტნიორზე საუბრისას.

სხვათა შორის, ფოქსის ნიშნობის ბეჭედსაც დიდი გამოხმაურება მოჰყვა რამდენიმე თვის წინ — წვეტებიანი რგოლი მოსახსნელად მტკივნეულია.

ფოტო: Emma Mcintyre / Getty Images

მეგანი და Machine Gun Kelly, რომელიც მუსიკოსია, კიდევ ერთ ცნობილ წყვილთან, კორტნი კარდაშიანთან და ტრევის ბარკერთან, მეგობრობენ. თუმცა, ფოქსის თქმით, ბავშვებისა და კორტნის და ტრევისის მიჯაჭვულობის გამო მათთან ურთიერთობას მაინცდამაინც ხშირად ვეღარ ახერხებენ.

ბრიტანულ ჟურნალთან საუბარში ფოქსმა ასევე ისაუბრა თავის შვილებზე. მსახიობის თქმით, თავის სამ შვილთან გენდერულ იდენტობაზე საუბარი მას შემდეგ გადაწყვიტა, რაც ერთ-ერთმა მათგანმა ადრეულ ასაკში კაბების ჩაცმა დაიწყო.

მეგანი ამბობს, რომ უამრავი წიგნი იყიდა, რომელიც ამ საკითხებს შეეხებოდა. მათი ნაწილი ტრანსგენდერი ბავშვების მიერ იყო დაწერილი.

"ზოგიერთი წიგნი იმაზეა, როგორ შეგიძლია იყო ბიჭი და კაბა გეცვას. შეიძლება საკუთარი თავი სამოსით გამოხატო ისე, როგორც გინდა და ამას სექსუალობასთან საერთოდ არ ჰქონდეს კავშირი", — ამბობს მსახიობი, — "მათ ამას ადრეული ასაკიდანვე ვეუბნებოდი ყოველდღიურად, რომ თავი უცნაურად ან განსხვავებულად არ ეგრძნოთ".

ფოქსი ასევე აღნიშნავს, რომ შვილებს სოციალურ ქსელებს არიდებს, თავის ანგარიშებს კი სხვა მართავს.