წყნეთში მოკლული კაცის საქმეზე პოლიციელს პატიმრობა შეეფარდა. თბილისის საქალაქო სასამართლოს ინფორმაციით, მას იარაღის გამოყენებით მოხელის მიერ სამსახურებრივი უფლებამოსილების გადამეტება და გაუფრთხილებლობით სიცოცხლის მოსპობა ედება ბრალად

"შუამდგომლობის განხილვისას, სასამართლომ მიიჩნია, რომ არსებობდა აღკვეთის ღონისძიების გამოყენების, როგორც ფაქტობრივი, ისე ფორმალური საფუძვლები. კერძოდ, ახალი დანაშაულის ჩადენის, მტკიცებულებათა მოპოვებაში ხელშეშლისა და მიმალვის საფრთხეები და თითოეული ამ საფრთხის ინტენსივობისა და მნიშვნელობის გათვალისწინებით, მიიღო გადაწყვეტილება ბრალდებულების მიმართ აღკვეთის ღონისძიების სახით პატიმრობის გამოყენების თაობაზე", — ნათქვამია სასამართლოს გადაწყვეტილებაში.

შემთხვევა 18 აპრილს მოხდა. პროკურატურის განცხადებით, პოლიცია ადგილზე ნარკოტიკული საშუალების უკანონოდ შეძენა-შენახვის შესახებ მიღებული ინფორმაციის გადამოწმების მიზნით მივიდა. პროკურატურის თქმით, კაცია მიწაში რაღაცას ეძებდა, რა დროსაც პოლიციელი მასთან მივიდა და უთხრა, რომ დაკავებული იყო.

უწყება განმარტავს, რომ კაცმა მიწიდან ამოღებული ნივთი გადაყლაპა და გაქცევა სცადა, რა დროსაც, მათივე ცნობით, პოლიციელმა გაუფრთხილებლობით გაისროლა, რის შედეგადაც კაცი გარდაიცვალა.

პოლიციელს ბრალდება საქართველოს სისხლის სამართლის კოდექსის 116-ე მუხლის პირველი ნაწილით (სიცოცხლის მოსპობა გაუფრთხილებლობით) და 333-ე მუხლის მე-3 ნაწილის "ბ" ქვეპუნქტით ( მოხელის მიერ სამსახურებრივი უფლებამოსილების გადამეტება, იარაღის გამოყენებით) წარედგინა, რაც 5-დან 8 წლამდე პატიმრობას ითვალისწინებს.