უკრაინის პრეზიდენტი ვოლოდიმირ ზელენსკი აცხადებს, რომ რუსეთისგან მოლაპარაკებების ფარგლებში არანაირი დოკუმენტი არ მიუღიათ. ის გამოეხმაურა კრემლის პრესსპიკერის, დმიტრი პესკოვის განცხადებას, რომ "ბურთი უკრაინის მხარესაა" და თქვა, რომ აჩვენებენ როგორ ურტყამენ კარში, როგორც კი ბურთს მისცემენ.

"პრინციპში, ადრე საკმაოდ კარგად ვთამაშობდი ფეხბურთს. რა წესებია იქ: ორი გუნდი უნდა გყავდეს და გქონდეს ბურთი. აქ მეჩვენება, რომ პესკოვი საკუთარ თავთან თამაშობს ფეხბურთს. ჩვენ აუცილებლად ვაჩვენებთ როგორ ვურტყამთ კარში, როგორც კი ბურთს მოგვცემენ", — თქვა ზელენსკიმ.

პუტინის პრესსპიკერმა, დმიტრი პესკოვმა განაცხადა, რომ უკრაინის მხარეს გადასცა დოკუმენტი, რომელიც "მკაფიო" ფორმულირებებს შეიცავს. პესკოვი ფიქრობს, რომ უკრაინა სცილდება მოლაპარაკებების გზას და იმუქრება, რომ "ამას ცუდი შედეგები მოჰყვება".

უკრაინის დელეგაციის წევრმა, მიხაილ პოდოლიაკმა განაცხადა, რომ რუსები ძალიან ხშირად იყენებენ საჯარო განცხადებებს ზეწოლისთვის და მოუწოდა მედიას, ისინი "ნიუსმეიქერებად" არ აქციონ. ასე გამოეხმაურა ის პესკოვის განცხადებას.