მაღალი თანამდებობის პირების გაფრთხილების შემდეგ, რომ რუსეთმა შესაძლოა, უკრაინის აღმოსავლეთზე შეტევა დაიწყოს, ვოლოდიმირ ზელენსკიმ განაცხადა, რომ დონბასისთვის ბრძოლა ახლა მიმდინარეობს. უკრაინის პრეზიდენტმა აღნიშნა, რომ ქვეყნის დასაცავად იბრძოლებენ.

"ახლა შეგვიძლია დავადასტუროთ, რომ რუსეთის ჯარებმა დონბასისთვის ბრძოლა დაიწყეს, რომლისთვისაც დიდი ხანია ემზადებიან. რუსეთის არმიის დიდი ნაწილი ახლა ამ შეტევაზეა მობილიზებული.

[...] ვიბრძოლებთ, უკრაინულს არაფერს დავთმობთ, სხვისი არაფერი გვჭირდება. მადლობელი ვარ ყველა ჩვენი მებრძოლის, ყველა გმირული ქალაქის დონბასში, მარიუპოლში, ხარკოვის რეგიონში, რომლებიც დაკავებულია", — განაცხადა მან.

პრეზიდენტის ადმინისტრაციის ხელმძღვანელის, ანდრეი ერმაკის განცხადებით, ომის მეორე ეტაპი დაიწყო.

"გჯეროდეთ ჩვენი არმიის, ის ძალიან ძლიერია", — მიმართა მან ხალხს.

მანამდე, უკრაინის თავდაცვის სამინისტრომ განაცხადა, რომ ოკუპანტები აღმოსავლეთ უკრაინაში შეტევისთვის ემზადებიან. უწყების თქმით, რუსეთმა თავდასხმის დასაწყებად ჯარების გადაჯგუფება უკვე დაასრულა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში