აქტივისტი, ზუკა ბერძენიშვილი სუს-ში გამოკითხვაზე დაიბარეს. როგორც სახელმწიფო უსაფრთხოების სამსახურში On.ge-ს განუცხადეს, ის გამოკითხვაზე ხვალ არის დაბარებული. სუს-ში დეტალებზე არ საუბრობენ, თუმცა როგორც ბერძენიშვილი გვეუბნება, ის სოციალურ ქსელში 14 აპრილს დაწერილი პოსტის გამოა დაბარებული.

"მთელი ამბავიც ეგ არის, რომ სახელმწიფო უსაფრთხოების სამსახურს ამოფარებული კანტორა, რომელიც ყველაზე დიდ საფრთხეს წარმოადგენს რეალურად, ამ რაღაც სპექტაკლს გვეთამაშება და ცდილობს, დანერგოს შიში, რომ თუ რამე გადატრიალებულ სიტყვას იტყვი, პრობლემა შეგექმნება. ეს ჩემი ინიციატივაც სტატუსით დაწყებული ემსახურება იმას, რომ თავად შეექმნათ ძალიან დიდი დისკომფორტი", — აღნიშნა მან.

"დღემდე ვფიქრობ იმაზე, როგორც გადაგატრიალოთ", — წერს ბერძენიშვილი პოსტში, რომელშიც საქართველოს მთავრობას მიმართავს.

"მეტსაც გეტყვით, არამხოლოდ ვფიქრობ, ამაზე ველაპარაკები ყველას და აგერ საჯაროდაც მოვუწოდებ ყველა მკითხველს, რომ მათაც მთელი დრო და ენერგია იმის მოფიქრებას დაუთმონ, თქვენ როგორ გადაგაგდოთ დაკავებული პოზიციებიდან და გაგებინოთ პასუხი ყველა საშინელებაზე, რაც ამ ქვეყანაში დაგიტრიალებიათ", — აღნიშნულია სტატუსში.

Facebook-პოსტის გამო სუს-ში გამოკითხვაზე დაბარებული იყო ტელეკომპანია ფორმულას ერთ-ერთი დამფუძნებელი და ტელეწამყვანი მიშა მშვილდაძეც. მშვილდაძემ სტატუსი 4 აპრილს დაწერა. ამით ის პრემიერმინისტრის განცხადებას გამოეხმაურა, რომელშიც ღარიბაშვილი უკრაინის "დასჯასა და დაჩაგვრაზე" საუბრობდა.