პარლამენტის თავმჯდომარე, შალვა პაპუაშვილი აცხადებს, რომ უკრაინაში ვიზიტისთვის ჯგუფს თავად დააკომპლექტებს, რომელიც ინტერპარტიული იქნება. მისი თქმით, დღეს სხვადასხვა ფრაქციის წარმომადგენლებთან შეხვედრები ექნება.

"უკრაინაში არის ომი, ვიზიტის ფორმატი არის სხვაგვარი. მე ჩემს კოლეგასაც ვუთხარი. დღეს მექნება შეხვედრა სხვადასხვა ფრაქციის წარმომადგენლებთან და თავისთავად, მე ამ ვიზიტისთვის დავაკომპლექტებ ჯგუფს, რომელიც იქნება ინტერპარტიული იმისთვის, რომ სხვადასხვა ფრაქციები იყოს წარმოდგენილი", — თქვა პაპუაშვილმა.

პაპუაშვილის განცხადებით, ქართული ოცნების წევრები შეთანხმდნენ, რომ უხერხულობისა და გაუგებრობის მოსაგვარებლად მისი უკრაინაში ვიზიტი მნიშვნელოვან როლს შეასრულებს. ამის შემდეგ პაპუაშვილსა და სტეფანჩუკს შორის ვიდეომიმართვა შედგა, რა დროსაც მხარეები უახლოეს დღეებში პაპუაშვილის უკრაინაში ვიზიტზე შეთანხმდნენ.

8 აპრილს საქართველოში უკრაინის საქმეთა დროებითმა რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევდა, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა უკრაინის რადას თავმჯდომარემ კოლეგას.

გუშინ კი სტეფანჩუკმა განაცხადა, რომ დღეს პაპუაშვილთან ოფიციალური ზარი ექნება და კიდევ ერთხელ დაუდასტურებს მოწვევას.

ამავე თემაზე: