ცნობილი ფრანგი მწერალი და კრიტიკოსი, ფრედერიკ ბეგბედერი, საქართველოს უკვე მეორედ ეწვევა. ავტორის წიგნების ქართველი გამომცემლის, პალიტრა L-ის ცნობით, ბეგბედერი მკითხველებთან შეხვედრებს 4 მაისიდან 6 მაისამდე გამართავს.

პოლიტიკის მეცნიერების, მარკეტინგისა და ჟურნალისტიკის სპეციალისტ ავტორს ათამდე რომანი აქვს გამოცემული. მათგან ყველაზე ცნობილია 99 ფრანკი, რომელიც 2000 წელს გამოქვეყნდა და ავტორს დიდი პოპულარობა მოუტანა საკუთარი ქვეყნის გარეთ. ასიათასობით გაყიდული ეგზემპლარის შემდეგ რომანი გადაიღეს ფილმადაც, რომელიც ეკრანებზე 2007 წელს გამოვიდა. არანაკლებ ცნობილია ბეგბედერის 2003 წელს გამოქვეყნებული რომანი Windows on the World, რომელიც 11 სექტემბრის ტერაქტს შეეხება. ამ წიგნისთვის მწერალმა პრესტიჟული ფრანგული ლიტერატურული პრემია, Prix Interallié, მიიღო.

ბეგბედერი საქართველოში 2016 წელსაც იმყოფებოდა. მაშინ ავტორმა აღნიშნა, რომ ქვეყანა მისთვის "თავისუფლების სიმბოლო" იყო და საქართველოში ჩამოსვლა 2008 წლის ომის შემდეგ უნდოდა.

აღსანიშნავია, რომ ფრანგ ავტორს რუსეთის პოლიტიკა და პუტინის ქმედებები არაერთხელ გაუკრიტიკებია, მათ შორის, ცოტა ხნის წინაც, როცა უკრაინელ ხალხს მხარდაჭერა გამოუცხადა.

სხვათა შორის, 2019 წელს, როცა რუსეთის პრეზიდენტმა ადგილობრივ ავიაკომპანიებს საქართველოში ფრენა აუკრძალა, ქართული ტურიზმის მხარდაჭერის კამპანიას ბეგბედერიც შეუერთდა და ხალხს საქართველოში მოგზაურობისკენ მოუწოდა.