ქიბარ ხალვაშის ადვოკატის, პაატა სალიას განმარტებით, რუსთავი 2-ის სასამართლო პროცესი შემჭიდროვებულ ვადებში არ მიმდინარეობს. ის განმარტავს, რომ 2016 წლის 8 იანვრის განჩინებით ხუთთვიანი განხილვის ვადა განისაზღვრა და შესაბამისად, ვადა 8 ივნისს იწურება.

ჟურნალისტის შეკითხვას, რას ფიქრობს სალია მოსამართლეთა კოლეგიის შეცვლის ლეგიტიმურობასა და ამასთან დაკავშირებით მისი მოწინააღმდეგე მხარეებისა და არასამთავრობოების პოზიციაზე, სალიამ უპასუხა:

"ძალიან ხშირად ხდება სასამართლოების კოლეგიების შეცვლა, მოსამართლეების შეცვლა. თან ისეთ ვითარებაში და პერიოდში, როდესაც ორ მოსამართლეს გასდის უფლებამოსილების ვადა, ინიშნება ახალი მოსამართლე, ახალი ვადით. ამდენად ეს ადმინისტრაციული საკითხებია, მე ამით არ დავინტერებულვარ. ჩვენი პოზიცია იყო ყოველთვის, რომ არ აქვს მნიშვნელობა, ვინ განიხილავს საქმეს, მთავარია სასამართლომ განიხილოს".

თბილისის სააპელაციო სასამართლოში რუსთავი 2-ის საქმის განხილვა აქციის ფონზე მიმდინარეობს. სასამართლოს ეზოში უკვე შეკრებილნი არიან ტელეკომპანიის მხარდამჭერები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.