"პროცესს არანაირი კავშირი არ აქვს სამართლებრივ პროცესთან, ის სრულიად ხელისუფლების და ბიძინა ივანიშვილის პოლიტიკურ სურვილზეა დამოკიდებული" - ასე განმარტავს ერთიანი ნაციონალური მოძრაობის წევრი, ელენე ხოშტარია რუსთავი 2-ის საქმის სასამართლო პროცესს და ამბობს, რომ საქმის ასეთი სისწრაფით განხილვა აბსურდია.

ხოშტარია აცხადებს, რომ მოსამართლის მიერ შუამდგომლობებზე უარის თქმაც აბსურდია, შესაბამისად როგორც ხელისუფლებას მოუნდება, ისე მოიქცევა სასამართლო:

"ჩვენ ვნახეთ, რომ ეს ერთხელ სცადეს დეკემბერში. ახლაც ხელისუფლებას უნდა ესმოდეს, რომ ამ გზით არა მხოლოდ იტაცებენ მედიას და აზიანებენ სასამართლო ხელისუფლებას, არამედ ისინი უარს ამბობენ მშვიდობიანი საარჩევნო გზით სიარულზე".

თბილისის სააპელაციო სასამართლოში რუსთავი 2-ის საქმეს მოსამართლეები, ნათია გუჯაბიძე, ნატა ნაზღაიძე და შორენა ყაველაშვილი განიხილავენ. პროცესის პარალელურად სასამართლოს ეზოში აქცია მიმდინარეობს.

ტელეკომპანიის მხარდასაჭერად შეკრებილები არიან ადამიანები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.

სააპელაციო სასამართლოში რუსთავი 2-ის საქმის განხილვა მხარდამჭერი აქციის ფონზე