მას შემდეგ, რაც რუსეთი უკრაინაში შეიჭრა და ომი წამოიწყო, რუსეთის ბაზარი უამრავმა საერთაშორისო კომპანიამ დატოვა. მათ შორის შანელის მოდის სახლიცაა, რომელმაც რუსეთში მდებარე მაღაზიები დახურა. ცოტა ხნის წინ კი შანელმა საზღვარგარეთ პროდუქციის მიყიდვა აკრძალა იმ რუსეთის მოქალაქეებისთვის, რომლებიც ბრენდის პროდუქციის რუსეთში წაღებასა და გამოყენებას აპირებენ.

როგორც ჩანს, მსოფლიოს სხვადასხვა ქვეყანაში შანელის მაღაზიიდან ხელცარიელი უამრავი რუსი გამოაბრუნეს, რადგან ინფლუენსერები მოდის სახლს რუსოფობიაში ადანაშაულებენ და პროტესტის ნიშნად შანელის ძვირადღირებულ ჩანთებს ანადგურებენ.

"თუ შანელი არ სცემს პატივს საკუთარ კლიენტებს, ჩვენ რატომ უნდა ვცეთ პატივი შანელს?" — ეკითხება რუსი მოდელი ვიქტორია ბონია თავის 9,3 მილიონ გამომწერს ინსტაგრამზე და შანელის ჩანთას მაკრატლით ჭრის.

"ერთი ჩანთა, ერთი ნივთიც კი არაა ჩემი სამშობლოსადმი სიყვარულზე, საკუთარი თავის პატივისცემაზე მნიშვნელოვანი. მე ვეწინააღმდეგები რუსოფობიას და ვეწინააღმდეგები ბრენდს, რომელიც რუსოფობიას უჭერს მხარს. შანელი აქსესუარია, აქსესუარების კომპანიაა, რომელმაც გადაწყვიტა, დაამციროს ხალხი, ჩემი თანამემამულეები და წარმომავლობის გამო მათ დისკრიმინაციულად მოექცეს, რასაც არ ავიტან. საბოლოოდ, ყველაზე მთავარი ხომ პრინციპებია — ის ხელში არ გიჭირავს, ის შენშია", — ამბობს მსახიობი და ტელეწამყვანი მარინა ერმოშკინა ინსტაგრამზე.

რა თქმა უნდა, რუსეთის მოქალაქეები მსგავსი ვიდეოს ავტორებს მხარდაჭერას უცხადებენ, თუმცა სხვა ქვეყნის წარმომადგენლები ინფლუენსერებს უკრაინის ომის პარალელურად ძვირადღირებულ ბრენდებზე გაბრაზების გამო აკრიტიკებენ.

თავად შანელმა განცხადება გაავრცელა, რომ ბრენდი ევროკავშირის მიერ რუსებისთვის დაწესებული სანქციების მიხედვით მოქმედებს და ყოველ კონკრეტულ შემთხვევაში უნდა შეამოწმოს კლიენტის საცხოვრებელი ადგილი და დარწმუნდეს იმაში, რომ ის ნივთს რუსეთში არ გამოიყენებს.

"[სანქციების] გამო ჩვენს იმ კლიენტებს, რომელთა მუდმივი საცხოვრებელი არ ვიცით, ვთხოვთ დაადასტურონ, რომ შეძენილ ნივთებს რუსეთში არ წაიღებენ. ვხედავთ, რომ აღნიშნული კანონის მიხედვით მოქმედებამ ჩვენს ზოგიერთ კლიენტს იმედი გაუცრუა. ამჟამად ჩვენ ვმოქმედებთ ჩვენი მიდგომის გაუმჯობესებაზე და ბოდიშს ვიხდით ნებისმიერი გაუგებრობისთვის, რომელიც შეიძლება გამოგვეწვია. წარმომავლობის მიუხედავად კლიენტების მომსახურება შანელისთვის პრიორიტეტია", — აცხადებენ შანელში.

ეს პირველი შემთხვევა არაა, როცა რუსი ინფლუენსერები უკრაინაში დახოცილი ადამიანების მაგივრად, მათთვის დაწესებულ შეზღუდვებზე დარდობენ. ცოტა ხნის წინ რუსეთში ინსტაგრამის დაბლოკვას ინფლუენსერები ქვითინით გამოეხმაურნენ.

ამავე თემაზე:

ცხოვრებას მართმევენ — რუსი ინფლუენსერები ინსტაგრამს ქვითინით დაემშვიდობნენ