ლონდონის ეროვნულმა გალერეამ ფრანგი ფერმწერის, ედგარ დეგას, ტილოს რუსი მოცეკვავეები სახელი შეუცვალა და უკრაინელი მოცეკვავეები უწოდა. დაწესებულების ცნობით, გადაწყვეტილება მიზნად ისახავს სხვა კულტურული ინსტიტუტებისთვის ბიძგის მიცემას, რათა უკრაინული ხელოვნებისა და მემკვიდრეობის მცდარი ინტერპრეტაციები შეასწორონ.

იმპრესიონისტი მხატვრის პასტელში შესრულებული ნამუშევრისთვის სახელის შეცვლას ეროვნულ გალერეას ინტერნეტმომხმარებლებიც სთხოვდნენ. მოტივი ნახატის ერთ-ერთი დეტალი იყო — ტილოზე გამოსახულ მოცეკვავეებს თმას უკრაინის ფერებში, ლურჯ-ყვითელში, გადაწყვეტილი ლენტები უმშვენებს.

"ამ ნახატის სახელწოდება წლების განმავლობაში განხილვის საგანი იყო მკვლევრებისთვის", — ამბობს ეროვნული გალერეის წარმომადგენელი, — "თუმცა, შექმნილი სიტუაციიდან გამომდინარე, საკითხს განსაკუთრებული ყურადღება ბოლო ერთი თვის განმავლობაში მიექცა. ამდენად, მივიჩნიეთ, რომ ნახატის თემის უკეთ ასახვის მიზნით ნამუშევრისთვის სახელის შესაცვლელად შესაფერისი დრო იყო".

გადაწყვეტილებას დადებითად გამოეხმაურა წარმოშობით უკრაინელი ხელოვნებათმცოდნე მარია კაშჩენკო.

"მესმის, რომ 'რუსული ხელოვნება' ერთგვარ ქოლგა ტერმინად იქცა, რომელიც წინათ მოსახერხებელი იყო გამოსაყენებლად, მაგრამ, მნიშვნელოვანია, ახლა ყველაფერი შევასწოროთ", — ამბობს მარია, — "როგორც უკრაინელ ადამიანს, ადრე ხშირად მომიხსენიებდნენ რუსად. იყო შემთხვევებიც, როცა უკრაინულ კულტურულ მემკვიდრეობას რუსულად წარმოაჩენდნენ".

სხვა ბრიტანული კულტურული დაწესებულებები ასევე ბევრმა გააკრიტიკა. მათ შორის იყო ლონდონში უკრაინული ინსტიტუტის ხელმძღვანელი ოლესია ჰრომეიჩუკი.

"ლონდონის გალერეაში ან მუზეუმში ყოველი სტუმრობისას ვხედავ, რომ საბჭოთა ხელოვნების ან კინოს გამოფენისას მთელი რეგიონი არასწორად, თავის შეუწუხებლად არის წარმოჩენილი ერთ უსასრულო რუსეთად. დაახლოებით ისე, როგორც რუსეთის ფედერაციის ახლანდელ პრეზიდენტს სურს, რომ ეს იყოს", — აცხადებს ოლესია.

ლონდონის ეროვნული გალერეის ცნობით კი, ისინი კვლევას განაგრძობენ და, საჭიროების შემთხვევაში, ხელოვნების ნიმუშების სახელწოდებებს და მათ შესახებ ინფორმაციას განაახლებენ.