თბილისის საქალაქო სასამართლოს განცხადებით, პატიმრობა შეეფარდა პირს, რომელიც შარტავას ქუჩაზე მანქანით ტროტუარზე მყოფ ბავშვს დაეჯახა. მათივე თქმით, ბრალდებული, რომელიც მართავდა BMW-ს მარკის ავტომობილს, ვერ უზრუნველყო საგზაო მოძრაობის წესების დაცვა, გადააჭარბა კანონით განსაზღვრული მაქსიმალური სიჩქარის ზღვარს და განახორციელა მეორე სამოძრაო ზოლიდან პირველ სამოძრაო ზოლში გადასვლის მანევრი, რა დროსაც დაეჯახა მოძრავ ავტომობილს.

"შეჯახების შედეგად მართვადაკარგული BMW გადავიდა გზის სავალი ნაწილიდან, ავარდა ტროტუარზე სადაც დაეჯახა ქვეითად მდგომ არასრულწლოვანს.

სასამართლომ დაადგინა, რომ მოცემულ სისხლის სამართლის საქმეზე არსებობს აღკვეთის ღონისძიების გამოყენების როგორც ფაქტობრივი, ისე ფორმალური საფუძვლები. ამასთან ერთად, სასამართლომ მიიჩნია, რომ სახეზეა ახალი დანაშაულის ჩადენისა და მიმალვის/მართლმსაჯულების განხორციელებისათვის თავის არიდების საფრთხეები და თითოეული ამ საფრთხის ინტენსივობისა და მნიშვნელობის გათვალისწინებით მიიღო გადაწყვეტილება ბრალდებულის მიმართ აღკვეთის ღონისძიების სახით პატიმრობის გამოყენების თაობაზე", — ნათქვამია განცხადებაში.

პროკურატურის ინფორმაციით, დ.ჯ.-ს ბრალი საქართველოს სისხლის სამართლის კოდექსის 276-ე მუხლის მე-4 ნაწილით (ავტომობილის მოძრაობის უსაფრთხოების წესის დარღვევა იმის მიერ, ვინც ამ სატრანსპორტო საშუალებას მართავს, რამაც ჯანმრთელობის მძიმე დაზიანება გამოიწვია), წარედგინა.

ტროტუარზე ბავშვს მანქანა 31 მარტს დაეჯახა. კლინიკაში გადაყვანისას, მას მრავლობითი ტრავმა აღენიშნებოდა.