ოკუპანტებმა ჩერნობილის ატომური ელექტროსადგურის ზონა დატოვეს. ინფორმაციას სახელმწიფო სააგენტო ავრცელებს, რომელიც გაუცხოების ზონის კონტროლზეა პასუხისმგებელი.

"ჯარების გაყვანისას ხდება შენობის ძარცვა, აღჭურვილობისა და სხვა ძვირფას ნივთების ქურდობა", — აცხადებენ უწყებაში.

ენერგოატომი კი სააგენტოს ხელმძღვანელზე დაყრდნობით წერს, რომ ოკუპანტებმა მოიპარეს კომპიუტერები, ქვაბები, ყავის მადუღარა და კონტეინერები. ასევე გაძარცვეს სასტუმრო ატომურ ელექტროსადგურთან და გაიტანეს სამზარეულოს ჭურჭელი, ჩანგლები, კოვზები და კომპლექტები

ჩერნობილის ატომური ელექტროსადგურის ტერიტორიაზე უკრაინელი სპეციალისტები მას შემდეგ შევლენ, რაც სამხედროები იქაურობას ასაფეთქებელი მოწყობილობების არსებობაზე შეაოწმებენ.

ატომური ენერგიის საერთაშორისო სააგენტომ განაცხადა, რომ ჩერნობილში სპეციალურ მისიას გაგზავნის.

"ატომური ენერგეტიკის საერთაშორისო სააგენტო მჭიდრო კონსულტაციებს აწარმოებს უკრაინის ხელისუფლებასთან უახლოეს დღეებში ჩერნობილში პირველადი დახმარებისა და მხარდაჭერის მისიის გაგზავნის თაობაზე", — ნათქვამია განცხადებაში.

წინა დღეებში გავრცელდა ინფორმაცია, რომ რუსმა ჯარისკაცებმა ჩერნობილის აკრძალულ ზონაში რადიოაქტიური მტვერი შეისუნთქეს და ჩერნობილიდან რადიოაქტიური ნივთიერებები მოიპარეს. ექსპერტები ფიქრობენ, რომ შესაძლოა, მათ ისინი "ჭუჭყიანი ბომბის" დასამზადებლად გამოიყენონ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში