ოსკარი 2022-ის წარმომადგენლების განცხადებით, უილ სმიტს კრის როკისთვის სახეში გარტყმის შემდეგ დარბაზის დატოვება სთხოვეს, მაგრამ მსახიობმა უარი განაცხადა. კინოაკადემიის მმართველთა საბჭომ, რომელიც გასულ ოთხშაბათს ამ საკითხთან დაკავშირებით შეიკრიბა, განაცხადა, რომ სმიტის წინააღმდეგ ქცევის სტანდარტების დარღვევის გამო სამართალწარმოება დაიწყო.

ბევრ მაყურებელს გაუჩნდა კითხვა იმის შესახებ, თუ რატომ არ დატოვა ოსკარის დაჯილდოების ცერემონია უილ სმიტმა ამ ინციდენტის შემდეგ. შეგახსენებთ, რომ უილ სმიტმა კრის როკისთვის სახეში გარტყმიდან ერთ საათში საუკეთესო მსახიობის ჯილდო მოიპოვა და სცენაზეც წარსდგა.

"მოვლენები ისე განვითარდა, რომ ამას არავინ ველოდოთ. ჩვენ სმიტს დარბაზის დატოვება ვთხოვეთ, მაგრამ მან უარი განაცხადა. შემდეგ კი გადავწყვიტეთ, რომ სიტუაციის მოსაგვარებლად სხვაგვარად მოვქცეულიყავით", — აცხადებენ კინოაკადემიაში.

კინოაკადემიის თქმით, სმიტს შესაძლებლობა ექნება, რომ თავი წერილობითი პასუხით დაიცვას, რომელსაც საბჭო 18 აპრილს განიხილავს. უილ სმიტს, რომელმაც დისციპლინური პასუხისმგებლობა დაარღვია, აკადემიამ სხვადასხვა ტიპის სანქცია შეიძლება დაუწესოს.

"უილ სმიტის ქმედებები ოსკარის რიგით 94-ე დაჯილდოებაზე შოკისმომგვრელი და ტრავმული იყო, როგორც დარბაზში მყოფი საზოგადოებისთვის, ასევე ტელევიზიის მაყურებლებისთვის. კრის როკს ბოდიშს ვუხდით სცენაზე მომხდარის გამო და კრიტიკულ მომენტში მისი გამძლეობისთვის მადლობელი ვართ. ჩვენ ასევე ბოდიშს ვუხდით ნომინანტებს, სტუმრებსა და მაყურებლებს იმის გამო, რაც საზეიმო ღონისძიების დროს მოხდა", — ვკითხულობთ აკადემიის განცხადებაში.

ოსკარის მიღების შემდეგ სამადლობელ სიტყვაში უილ სმიტმა კინოაკადემიას ბოდიში მოუხადა, თუმცა კრის როკი არ უხსენებია. მოგვიანებით კი კრის როკს უილ სმიტმა ბოდიში საჯაროდ მოუხადა. "მინდა, ბოდიში საჯაროდ მოგიხადო, კრის. ზღვარს გადავედი და არასწორად მოვიქეცი. ძალიან მრცხვენია. ჩემი ქმედება არ შეესაბამება იმ კაცისას, რომელიც მინდა, რომ ვიყო. სიყვარულისა და სიკეთის სამყაროში ძალადობის ადგილი არაა", — წერს უილ სმიტი კრის როკს. შეგახსენებთ, რომ კრის როკმა უილ სმიტის წინააღმდეგ საქმის აღძვრაზე უარი უკვე განაცხადა.