ბრიუს უილისის ოჯახის განცხადებით, მსახიობი თავის პროფესიული საქმიანობის გაგრძელებას ვეღარ შეძლებს, რადგან აფაზიის დიაგნოზი დაუსვეს. აფაზიის დროს მეტყველების უნარი ქვეითდება, რაც ტვინის დაზიანებითაა გამოწვეული. ოჯახის წევრებმა სოციალურ ქსელებში ერთობლივი განცხადება განათავსეს და ასე შეატყობინეს საზოგადოებას ბრიუს იულისის მიერ მსახიობობაზე უარის თქმა.

"ბრიუსის გულშემატკივრებისთვის გვინდოდა გაგვეზიარებინა ის ამბავი, რომ ჩვენს საყვარელ ბრიუსს ჯანმრთელობის პრობლემები აქვს. მას ახლახან დაუსვეს აფაზიის დიაგნოზი, რაც მის კოგნიტიურ შესაძლებლობებზე ახდენს გავლენას. ამის გამო ბრიუსი ტოვებს თავის სამსახიობო კარიერას, რომელიც მისთვის ძალიან ბევრს ნიშნავდა", — ვკითხულობთ უილისის ოჯახის განცხადებაში.

უილისმა კარიერა 1980-იან წლებში დაიწყო და განსაკუთრებული წარმატება 1988 წელს ფილმში Die Hard შესრულებულმა ჯონ მაკკლეინის როლმა მოუტანა. ათწლეულების განმავლობაში მსახიობმა კიდევ არაერთ გახმაურებულ ფილმში მიიღო მონაწილეობა და მრავალი საკულტო პერსონაჟი შექმნა, რომელთაც დღემდე მილიონობით გულშემატკივარი ჰყავს მთელ მსოფლიოში.