უკრაინული მედიების ცნობით, ვოლოდიმირ ზელენსკიმ ხელი მოაწერა განკარგულებას მაროკოსა და საქართველოდან უკრაინის ელჩების გაწვევის შესახებ. ამის შესახებ ინფორმაციას გამოცემები, UNIAN და უკრაინა 24 ზელენსკის ვიდეომიმართვაზე დაყრდნობით ავრცელებენ.

"არიან ისეთები, რომლებიც ყველასთან ერთად მუშაობენ სახელმწიფოს დასაცავად და არიან ისეთებიც, რომლებიც ტყუილად კარგავენ დროს და მუშაობენ მხოლოდ იმისთვის, რომ დარჩნენ თანამდებობაზე. არ იქნება იარაღი, არ იქნება სანქციები, არ იქნება შეზღუდვები რუსეთის ბიზნესისთვის — მოძებნეთ სხვა სამუშაო" — UNIAN-ის ინფორმაციით, ასე განაცხადა ზელენსკიმ ვიდეომიმართვაში.

გარდა ამისა, სუსპილნეს ინფორმაციით, პრეზიდენტმა განაცხადა ისიც, რომ სხვა ქვეყნებში რუსეთისთვის საქნციების დაწესებისა და უკრაინის დახმარებისთვის ელჩებისა და სამხედრო ატაშეებისგან ძალისხმევას ელოდება.

აღსანიშნავია, რომ ზელენსკიმ საქართველოდან ელჩი კონსულტაციებისთვის პირველ მარტს გაიწვია. მაშინ უკრაინის პრეზიდენტმა განაცხადა, რომ ამის მიზეზი სანქციებზე "ამორალური პოზიცია" და უკრაინაში მოხალისეების წასვლაში ხელის შეშლა იყო.

საქართველოში უკრაინის ელჩის მოვალეობას ანდრეი კასიანოვი ასრულებს. სპეციალურ ბრიფინგზე მან აღნიშნა, რომ ზელენსკი კონსულტაციებზე გაწვეულ ელჩთან სხვადასხვა საკითხს, მათ შორის, უკრაინაზე საქართველოს პოზიციას განიხილავდა.

ამ დრომდე ცნობილი იყო, რომ ელჩი იგორ დოლგოვი საქართველოშია. ის რამდენჯერმე იმყოფებოდა უკრაინაში დაღუპული ქართველი მებრძოლების ხსნოვის პატივსაცემად გამართულ აქციაზე.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში